Saturday, April 21, 2018
OBB Latest News:

Obudhingiya folk stories

BADU̱BHA OBU̱U̱LI̱YA
Mubulya Wilson

Haanu̱ma ya myaka joo Kongo emali̱ye kutunga kwelema, mu kyalo kya Katuwa e Bhutembo bakatunga mughenu̱ mujungu mu miisonale. Mujungu oghu akaba alu̱ghi̱ye Bungeleeja ali na myaka 79 ya bukulu. Mali̱i̱na ghe aaniiye Charles Rollings.
Mbyaluwa sya mukyalo eki syabu̱ghagha lunande/Lukonjo. Bamui mu bo bakaba bamani̱ye Kiswahi̱li̱ na basomi̱ye bamani̱ye Lufulansa. Na Rollings aabu̱ghagha lujungu lwonkaha. Bantu abaabbalagha ku̱bu̱gha naye baasaalilagha mwa mwegheesi̱ya wa lujungu mu si̱ni̱ya eghi ekaba eli haai nabo. Mu kisiika hambali aalaalagha akaba alimu na lubbaau na cooka sya kuhandi̱i̱ki̱ya. Bantu abaghendagha kumolola, nuwaamala kumulamu̱ki̱ya akukwati̱ya cooka kuhandiika li̱i̱na lyawe haa lubbaau.
Kilo kimui musaasa mukulu mu̱su̱u̱bu̱ji̱ kandi aghonji̱ye di̱i̱ni̱, Kyamukaagha lwagholo aghenda kulamu̱ki̱ya mu̱ghenu̱ wabo. Akonkona haa lwighi, mujungu amuughulila ataaha. Balamukani̱ya oli ati, “Gu̱du̱mooni̱ngi̱” nooli̱ ati, “Habari” Byakwongel’o byabula baakala balolaane. Nga ngeso yee, aaha musaasa mukulu ki̱ghendu̱ kiye kibheghe kya cooka. Aakikwata eegota haa lubbaau kuhandiika li̱i̱na liye kulungi mu byapa ati “MBASA”. Obu aamali̱ye, aalyongota aahundamu. Mujungu aasikamu kwighi kuwe aatu̱mana haa bitabo biye. Musaasa oni obu aatooye aaghenda mu kicumbilo aayayo ndyankui kyabhu̱la aasa nayo ewaa mujungu. Aati̱ngita lwighi lwehighula aataaha akwete kyabhu̱la kini. Obu mujunju aamu̱bhelu̱mi̱ye, aahanja ebi aakolagha aamatuka amujwikila na ndyankui yoona aamu̱su̱ku̱ma enja. Musaasa mukulu oni baamu̱twesi̱ya kaahi̱yo-kaahi̱yo, oli naabu̱gha ebi̱ye nooli̱ ebiye bataaku̱u̱ghu̱wana. Mujungu aati̱ngi̱tamu na maani̱ ghoona lwighi gboku̱; na kutaamu buughali̱yo. Aasitama haa bulili, saghama yaamuumilila, esoke lyatandika ku̱mu̱bi̱na haa mutuwe, eni kitima nki̱neehesi̱ya kiti, “Ku̱dhu̱-ku̱dhu̱, ku̱dhu̱, ku̱dhu̱—. Musaasa waawe Mbasa naye eni hanja ghutamulimu. Ati, “Bhaawai̱ naahemu̱ki̱ye mu̱ghenu̱ waatu aku̱u̱su̱ki̱lani̱yamu a kaa Lumumba.” Aghile ati , ‘Naabaagha ni̱i̱si̱ye kumwati̱ya na ndyankui kuni bbaa!’ ”
Du̱mbi̱ aaghenda ewaa mwegheesi̱ya oghu akuhindulagha ebyabo na mujungu. sikaba sili haai nga saaha eku̱mi̱ sya lwagholo. Aaki̱dha weena ahooyemu. Aasanga mwegheesi̱ya ali haa kiikopo kya caai naakebela bitabo bya baana. Mwegheesi̱ya eekanga kubona musaasa muntu mukulu naaheeselukana nga muntu aali̱gi̱ti̱ye haa bulemo kedha oghu aleeti̱ye makulu ghaakusaba mwongelo. Mwegheesi̱ya aamughila ati, “Tulimu” musaasa mukulu oghu aakuukamu ati, “Gutu onjune kijibu kini, si̱ye kitandu̱ghi̱i̱li̱l’o. Mwegheesi̱ya aamuhanga abili. Aamala daki̱i̱ka nga esatu naanahuumulikana nga muntu aku̱komi̱ya kubbala ku̱twii̱kana. Obu aamali̱ye kuhuumulikana, aamuuhilamu liyo lyona. Aaghila ati Kijibu kyabaaye haagati yabo bombi kutaba na lu̱bu̱ghe lwa kubalungani̱ya. Aamughambila ati kughendeleluwa kiye kyabaagha kumughambila makulu ghaa li̱ina liye Mbasa elikumani̱i̱si̱ya ndyankui mu lukonjo. Ati niikiyo kyaleki̱ye endela ndyankui mu kicumbilo. Aasaba mwegheesi̱ya kughenda e waa mujungu amwesengeleli̱ye atabi̱holi̱ya nanga mujungju aghenda kubbala bulaalo kedha kulanga mu baa bu̱sobœli̱. Mwegheesi̱ya eehuulayo kaakopo ke kaa caai aati̱gha binji byona. Musaasa mukulu anabi̱li̱ndi̱ye. Musaasa mukulu oghu aamughila ati, “Gutu okole byona ebi okusobola tankududukana otakaku̱u̱ki̱ye.”
Mwegheesi̱ya aaghenda nanguwa nga muntu oghu akughenda ku̱ni̱i̱na bbaasi eghi eli haai kusimbula. Aaghenda, aaki̱dha aakonkona haa lwighi, aategheeleli̱ya ataaghu̱wa na nkabaalala ya muntu. aakal’o haala kumala daki̱i̱ka nga etaano, aatodha aakonkona. Mujungu aamuka haa bulili ghutamulimu neeli̱li̱kana ati siti Mbasa endeeye bantu baakukwati̱i̱sani̱ya nabo kumumal’o. Aadu̱bha aalolola mu kahulu kaa lwighi. Obu aaboone mulungani̱ya wabo oni, du̱mbi̱ aaghula lwighi bwangu-bwangu. Aabu̱gha naye mu biiweewe ati, “Weekambe otaahe ekati bwangu nanga tuli ha buukenke.” Eli haa mutima ati ki̱i̱se tanku̱ku̱wa nenkaha bbaa. Aatodha aataamu lwighi luwe beehighala fui. Dhaani boona baalolana. Obu haa mutima ghwa mjungu eli ng’oghu oti baamutaayo piki-piki esi̱ku̱tu̱tu̱ma. Mujungu aahuumula ng’oghu aku̱lu̱gha kukununuka mwena ati, “Ohuu…!’ Aatandika kumughambila byona ebyamubaay’o. Na mwegheesi̱ya naye aamughambila ekyamu̱leeti̱ye. Mujungu aakeekela kijungu ati, “Ha,haa!” andi̱ngi̱ya mutuwe. Aamuka aaghuwa mwegheesi̱ya mu ki̱ku̱bha ati, “Mukama asi̱i̱mu̱we” na mwegheesi̱ya ati, “Amiina.” Boona baateli̱ya hansi baatandika kusaba bu̱li̱ omui mu lwewe. Kumanya mujungu maku̱ni̱ ghamwi̱ti̱ye, aasabagha naaku̱mi̱ya bighambo mbinatwi̱ka-twi̱ka.
Mwegheesi̱ya aakuukayo ewe, muunakiye aamuuhilamu kighele. Taaseli̱ye nangoku bwabaagha mbughenda kwita maaso. Mwegheesi̱ya akasanga musaasa mukulu analoleleeye elembo. Aamughila ati, “Waamusangi̱y’o? Oli̱ aasi̱i̱ma. Aamughila ati, “Onkobhe nagho. Aamughambila byona ebyabaay’o du̱mbi̱ musaasa aamanya kukuukayo ewe. Nkyambisi, Mbasa aabighambila abaasi̱ye mu kani̱sa kusaba. Aaghila ati, “Luhanga ali na bu̱toki̱ kandi akuhaagha bisembo kaati̱-kaati̱. Tooli̱ badu̱bha obu̱u̱li̱ya.”

Bu̱ku̱u̱bbi̱ ni kujaabhuwa

Si̱ye maaha akanti̱gha ndi na myaka enaa ya bukulu. Nankabha tita naabaagha na bakali̱ banji. Taaliyo n’omui oghu
akaneekundila nga mwana wee. Bwile bunamu̱nji̱ tita taakalagha e ka. Akaba ali na mulimo mu gavumente. Akaba ali w’omuluka kandi aakilagha kwisa e ka haanu̱ma ya sabbi̱i̱te ebili. Tita kutaakala e ka kikambeela kijibu. Obu twabaagha ntuliya baakala kundola ki̱i̱so-ki̱i̱so. Byokuliya mbyahuwa handiilo, si̱ye batatodha kumpa kaa nkolo munagha.
Nga bu̱li̱ kilo nku̱u̱bbi̱ sikulwalagha njunja. Nkaba na mu̱gi̱sa syangu̱tu̱wakaki̱ye bighele na kunjiyamu bi̱ku̱lu̱. Tita naabu̱u̱li̱ya ekikulekagha batasinjiya bampabi̱i̱li̱li̱ya bati nkusibhengelagha. Tita naaghu̱wa eki, ampuulanga atambu̱u̱i̱ye. Bhaawai̱ bu̱ku̱u̱bbi̱ ni ndwala. Nku̱u̱bbi̱ teeli̱ya, egbu̱u̱ma. Nku̱u̱bbi̱ eekala kuliya mbanaghi̱mi̱ghangila biyo mu ngalo; baakala kughinokomeelela.
Kilo kimui mukaa tita mugholi aghila ati akunjiya njunja. Eghi aakanjiyagha anconconamu kaahi̱yo. Ankamilamu biijai̱ abi̱lu̱ngani̱i̱yemu kaamulali. Mukilo ndaala ntaghwesaghiiye, ninkakamiililuwa kandi nindila.
Ekyalu̱ghi̱yemu, naaghenda hambali maaha aabaagha asweuwe. Mu bilo bikee njunja syankila. Nkalu̱ghayo kwisa kutandika kusoma ninaahi̱ki̱ye wa kusyehiya neenini.
Bakali̱ na basaasa muukalaghe mu bumui. Ku̱gu̱mi̱si̱li̱ja na kwesighangana niibiyo bikulekagha buswele buhangaala.

Ngughuma sikusasulagha
Mwesige Robbin

Hakaba aliyo basaasa babili, omui aaniiye Bu̱dhooti̱bwabo nonji aaniiye Bukalali̱ya. Bombi bakaba bali bateghi̱.
Bukalali̱ya na Bu̱dhooti̱bwabo baaghenda mu kisaka kutegha. Haanu̱ma ya bilo bibili, Bu̱dhooti̱bwabo aaghenda kwanja ki̱ki̱ya kiye. Mu ki̱ki̱ya aasangamu nkubha ekwatu̱u̱wemu. Nkubha yaamughila eti, “Bu̱dhooti̱bwabo, onsumuulule nanje ndikuyamba kilo kinji.” Bu̱dhooti̱bwabo aaghisumuulula.
Bukalali̱ya naye aaghenda kwanja ki̱ki̱ya kiye, naye aasanga nkubha ekwatu̱u̱wemu. Yaamughila eti aghisumuulule nayo elimuyamba kilo kinji. Bhaatu Bukalali̱ya aaghikuukamu ati, “Okilole kiyo ngoku ki̱tu̱ku̱li̱laniiye.” Eehogbuwa aaghenda aaghi̱ti̱gha yaagundilamu.
Bukalali̱ya aaghenda haa ki̱ki̱ya kiye kinji aasangamu njoka ekwatu̱u̱we. Njoka yaamughila eti, “Tonsumuulula wai̱, naje ndiisa kukuyamba kilo kinji.” Bukalali̱ya aaghighila ati, “Maa ee, okilole kiyo kini ngoku ki̱bbu̱du̱ngu̱ki̱ye bi̱i̱so kyatodha kyajambukana nga mulabha, okubona, ekibagagaali̱ya.” Bukalali̱ya eehingiya, eeghendela. Na Bu̱dhooti̱bwabo naye aaghenda kulola ki̱ki̱ya kiye aasanga njoka ekwatu̱u̱wemu. Yaamughila eti, “Wai̱ kabhootu̱ onsumuulule nanje ndikuyamba lunji.” Bu̱dhooti̱bwabo aaghisumuulula du̱mbi̱ aaghenda ewee.
Bu̱dhooti̱bwabo na Bukalali̱ya baaghila bati baahi̱ki̱ye kuswela. Bu̱dhooti̱bwabo aaghenda mu beesekulu be kubbala mukali̱ wa kuswela. Obu aaki̱dhi̱ye aabaghambila ekyamu̱leeti̱ye. Baamutwala e waa musaasa oghu ali na baana boobukali̱. Baamuha ndyankui kughenda kwati̱ya ki̱ku̱mbi̱. Baamutwala baamwoleka kibaale kighendelaana bati, Waati̱ye lukui ndwolu.” Aalola eku̱wa na elughulu. Aahi̱dha ndyankui kukinga kwati̱ya ebaale. Du̱mbi̱ ki̱i̱luu̱bbu̱ kyakwata, nkubha yeetanu̱ka kibaale kini kyacencebhuka bihande-hande. Baakuuka e ka baahi̱ka baabu̱u̱li̱ya baana abaabaagha nabo bati, “Ki̱ku̱mbi̱ aakyati̱i̱ye?” Baaghila bati, “Ee, aakyati̱i̱ye kyona-kyona.” Baaghila bati mumuhe kipanga aghende mu musili ateme. Baamuha kipanga baamutwala kumwoleka haa kukola. Obu baaki̱dhi̱ye, baamwoleka aasanga hambali baamwoleki̱ye mabhi̱ ghamalakaki̱y’o hoona-hoona na bukondelo butali. Aabu̱u̱li̱ya ati, “Kini niikiyo kisaka kya kutema?” Baamughila bati, “Ee niikiyo eki.” Aakwata kipanga aagomba kutandika kutema. Du̱mbi̱ aabona njoka ehooyeyo yandalila haa mabhi̱ du̱mbi̱ ghoona luhande lumui ghatandika kukota mu ki̱i̱na. Aasinjil’o kati̱i̱, baana baamughila bati, “Tukuuke e ka saaha syatu̱ti̱ghi̱ye.” Baaghenda baakuuka e ka. A b’eka baabu̱u̱li̱ya alakaba naakoli̱ye mulimo. Baana baamuheela buukai̱so bati aaghu̱koli̱ye ghwona kusemeeye. Baana bani baamughambila bati, “Mbaakughambiiye kukoma ehu̱si̱ko, okomemu elili na mwali na kahumbu.” Obu baaki̱dhi̱ye ab’eka baamughila bati, “Oghende weekomele ehu̱si̱ko limui elyetwalile, nuwaahi̱ki̱ye mu kihanda olisambuule. Niikuwo aaghendi̱ye aakoma ehu̱si̱ko elikaakuuye. Mahika mu kihanda alisambuula aalu̱ghamu mukali̱ atasemela atiyo, aaghenda aamu̱ki̱dhi̱ya e ka e waabo.
Kilo ekyalabhi̱y’o Bukalali̱ya naye aaghenda mu beesekulu kubbala mukali̱ wa kuswela. Baamutwala hambali akutungila mukali̱ wa kuswela. Naye baamuha ndyankui baamuha baana kughenda kumwoleka lukui lwa kwati̱ya. Obu baamutwete baamwoleka kibaale kighendelaane, baamughila bati, “Lukui ndwolu.” Aanakuukamu ati, “Enu̱we mulwaye! Niha hambali bakwotagha mabaale?” Aakwata ndyankui aaghikonda haa ebaale yoona yakongoleka, aatodha aaghi̱kondi̱y’o, yeeku̱na-ku̱na mu maano. Baakuuka e ka, baabu̱u̱li̱ya alakaba naati̱i̱ye lukui olu. Baana bati, “Bbaa, na ndyankui yoona yaatwi̱ki̱i̱y’o.” Baaghila bati mumuhe kipanga aaghende ateme kisaka. Aaghila ati hakili kutema kusaai̱ye kwati̱ya bibaale.” Baaghenda baamwoleka haa kutema, hoona-hoona ghakaba ghali mabhi̱
ghasa-ghasa. Aabaghila ati eye taabbali̱ye kwemalaka-ki̱ya bi̱bhi̱ kwenu̱nki̱ya. Baakuuka e ka. Baababu̱u̱li̱ya mulimo ghulakaba nighwakoleeu̱we. Baana baaghila bati, “Na kati.”
Baaghila Bukalali̱ya bati mu mahu̱si̱ko eekomelemu limui alalisambulile mu kihanda. Eekomela ehu̱si̱ko elikubbebbeniya kandi elitelelu̱ki̱ye. Obu aahi̱ki̱ye mu kihanda aalisambuula, akabona kibhughuma kya ntale nki̱hu̱ghu̱kamu. Bukalali̱ya obu aaboone eki aaki̱ndu̱kila ndigito, aali̱gita ntale yaati̱ghala esweki̱ye. Bukalali̱ya aakuuka atali na mukali̱.

Njala ekulehi̱yagha bintu
Sunday K Ezra

Akaba aliyo musaasa li̱i̱na aniiye Kyetunda. Akaba ali na mukali̱ wee omui na baana be basatu.
Njala yaaghuwa mu kyalo kyona. Muntu noobu abaagha na sente haa kughulila byokuliya hakaba atali. Kilo kimui Kyetunda waawe akwata buta buwe na muholo ghuwe kughenda kubbalila baana be na mukali̱ wee byokuliya.
Obu aaghendi̱ye, aabona kikonje kingaalu̱wa kihangiiye. Naaneebinga kikonje eki nakiyo kyakala nki̱neesu̱kana. Aakikwama, aakikwama eetu̱lakaka aki̱dhi̱ye haa ka. Haakpengbu̱ bikonje bikaba bitukulilani̱i̱ye mu musili. Ki̱i̱se ka eni ekaba eli ya Ki̱i̱si̱i̱li̱mu̱. Ki̱i̱si̱i̱li̱mu aamwebali̱ya ati, “Kau mu̱ghenu̱” naye aakuukamu kindi busaasa ati, “Nkusangi̱ye” Ki̱i̱si̱i̱li̱mu̱ aymuha ntebe aasitma baalamukani̱ya. Baaghahaana, baaghaana. Ki̱i̱si̱i̱li̱mu̱ waawe aaghila ati baamali̱ye kuba bana bu̱u̱bhootu̱. Aamughila ati aghende aleete mukali̱ wee na baana be baleke kuukala mu njala. Kyetunda aakuuka e we na luko lumui lwa kikonje kihangiiye. Obu aabaagha naanaghenda aasangaana mbuuku mu kihanda aaghilasa yaaku̱wa aati̱gha aghi̱bi̱si̱ye. Aaghenda aaki̱dha aaghambile abe bya bu̱u̱bhootu̱ bwabo na ku̱ku̱lu̱ka kwabo. Baaheekelana byabo byona baaghenda. Obu baahi̱ki̱ye mu kihanda Kyetunda aayayo mu̱ku̱ ghwa mbuuku baaghu̱si̱ka baaghenda baaki̱dha e waa bhootu̱ syabo.
Bwile obu bwakeeye, Ki̱i̱si̱i̱li̱mu̱ aaghila bhootu̱ wee ati eye alimaghenda kwebungabu̱ngi̱ya. Tooli̱ ahaaghe mugimba ghumui ghwa kikonje ateeke na mwana wee omui niighuwo ghukuba mukubi ghwa Ki̱i̱si̱i̱li̱mu̱. Musaasa aasi̱i̱ma, aahaagha kikonje aateeka kibelo kimui kya mbuuku. Aani̱i̱ni̱ya mwana wee omui mu kiti ekyabaagha haagati ya ka ya Ki̱i̱si̱i̱li̱mu̱ hambali aasitamagha mu nti̱na ya kiti eki. Ki̱i̱si̱i̱li̱mu̱ waawe aakuuka aaliya, eegbeeku̱wa ati, “Heei̱yaa, ebyanje byeleeta.” Bwala, baalaala bwakiya. Nkyambisi aatodha aaghenda kwebungabu̱ngi̱ya aamughila ati, atodhe aate mwana onji ateeke mugimba ghwa kikonje. Musaasa aatodha aakola magheji nga ghali̱. Baana boona aabani̱i̱ni̱ye mu kiti baati̱ghala na mukali̱ wee. Ki̱i̱si̱i̱mu̱ aamughila ati aate mukali̱ wee. Aateeka mwana ghwa kumaliilila ghwa mbuuku, aani̱i̱ni̱ya mukali̱ wee dhee. Boona obu baahooye, Ki̱i̱si̱i̱li̱mu̱ aaghila bhootu̱ siye ati, “Oteeke mugimba ghwa kikonje si̱ye nkwisa na mukubi ku̱lu̱gha mu lughendo. Musaasa aateeka mugimba ghwa kikonje naye aani̱i̱na mu kiti. Obu Ki̱i̱si̱i̱li̱mu aaku̱u̱ki̱ye, aahi̱ka aataaha mu numba yee aatwesi̱ya mati̱mu̱ ghe mukaagha aaghasimba mu mi̱li̱ ya kiti hambali Kyetuna n’abe bani̱i̱ni̱ye. Ki̱i̱si̱i̱li̱mu̱ aasitama haa ntebe aaghila ati, “Ebyanje byeleeta; Kyetunda obwalo niiyo bukenga.” Anali haala mwana wa bukulu wa Kyetunda kongo yaamukwata, aaghila ati akuniya, baamu̱hi̱nda aabhenga. Aaniya mabhi̱ gheegbadhikila Ki̱i̱si̱i̱li̱mu haa mutuwe eghulu na haa mabegha. Ki̱i̱si̱i̱li̱mu̱ eeku̱m’o aanu̱nka aaghila ati, “Ghani ni mabhi̱ ghaa muntu.” Obu aaloli̱ye eghulu aabona Kyetunda, mukali̱ wee na baana be. Aaghila kyetunda ati, “Nanje mu̱u̱ni̱i̱ni̱ye nkubooleka esamba lyanje na kibanja kyanje hambali biheleeye. Baaki̱su̱ndu̱ki̱li̱ya mughuwo oghu baani̱i̱ni̱lagh’o. Aatandika ku̱ni̱i̱na. Obu aabaagha ali haai kubahi̱k’o aalengemeeleluwa baalekela mughuwo Ki̱i̱si̱i̱li̱mu̱ aataasukayo aahi̱ka eetunga haa mati̱mu̱ aataka kpiiyo, aaku̱wa. Kyetunda n’abe baasu̱ndu̱ka baatunga musili ghwa busa. Nandi Kyetunda ati, “Ebyanje byeleeta”

BUGHEJI TAKULI KUNEETA
Baguma Godfrey

Obu kyanda kyahingulaane, bihamba na maasi ghoona ghooma mukyalo. Binyama byona bya mu kisaka byagumbaana niikuwo byelimile ki̱i̱na bikole nsulo. Binyama byona biinamu̱li̱to na biinabwana byasa.
Byadu̱bha kwekomela mukama. Kaluulu kaakwata Wanjoghu̱ kuba mukama wabiyo nanga niiye abisaaye kuneeta. Byahikilani̱ja kilo kyakutandika kulima kwetungila maasi. Byalima, byatunga maasi ghaabiyo. Bisolo byona byakola mulimo kyonkaha Wakame aabhenga kwelungani̱ya nabo. Byatu̱wamu kut’o mu̱li̱ndi̱. Byakoma Wantale kuba mu̱li̱ndi̱ wa maasi.
Wakame waawe aaghenda aakwata ki̱su̱si̱, anjunga-jungilamu bisaabo na musene. Obu aamali̱ye du̱mbi̱ aaku̱ndi̱ki̱la, aaghenda kulola maasi aghabaaghomooye. Naaneebinga maasi Wantale aamubona anali hambali eebi̱si̱ye. Wantale aamughila ati, Wakame akuukile haala, okabhenga ku̱tu̱li̱mi̱i̱si̱ya maasi.” Wakame aamughila ati, “Si̱ye tankunuwagha maasi ghaanu agha bbaa, bukuwe bwanje bakundeetelagha ghanje aghalimu ki̱li̱i̱si̱ya.” Aaghila Wantale ati aase anuuw’o niikuwo aaghu̱we bu̱nu̱li̱ bwagh’o. Wantale aalu̱gha hambali aabaagha eebi̱si̱i̱ye aasa.
Wakame aamughila ati, “Ntakakuhaaye kunuw’o odu̱bhe oghende ojombe bighoye byomiiye myeteete, mali̱gi̱ na bu̱u̱ku̱u̱se obileete. Wantale aaghenda aabijomba, aabileeta. Obu aabi̱leeti̱ye, Wakame aamulaghila kubitalamu ki̱ti̱bo. Aabitala du̱mbi̱ aamughila ati, asi̱i̱me adu̱bhe amubohe niikuwo amuuhe anuwe haa maasi ghaa bukuwe buwe. Wakame aaboha Wantale.
Obu aamali̱ye kumuboha atali na bwesumbulilo, aatandika kumuhuula na bi̱ghu̱mo-ghu̱mo bya ki̱tu̱lu̱. Wakame aatu̱ngu̱dha bisaabo bini aatahilamu maasi ghagenenu̱ki̱ye aacu̱ku̱mu̱la, aanaabi̱yamu kulungi. Aadu̱bha aanuwa, aakota mu maasi aanaaba aatodha aaghaniyamu. Aaghenda, aati̱gha Wantale anaboheeuwe. Obu binyama binji bwasi̱ye, kutaha maasi Wantale aabighila ati bimusambuule. Aabisoboolola byona ebyamubaay’o. Bisolo byatuwamu kut’o kongo kuba mu̱li̱ndi̱ wa maasi. Kongo aasi̱i̱ma aaghenda eebi̱sa mu ngu̱gu̱ kulinda Wakame. Wakame waawe obu aasi̱ye aalolakaka ataabona na kantu. Aakota mu maasi kutandika kunuwa na kutaha. Du̱mbi̱ kongo aalu̱gha mu ngu̱gu̱ aasa aaluma Wakame haa kilimi. Wakame aahu̱ghu̱ka mu maasi aahanja ki̱su̱si̱ kiye kyasenda. Wakame aasaaghuwa ku̱bu̱gha. Wakame aatokani̱ya kwehiya kongo byaba bilajo. Wakame aaghenda e wee kongo anamukpatidhilaane haa kilimi. Obu baahi̱ki̱ye e ka mukaa Wakame eesengeleli̱ye kongo kulekela ebawee. Kongo aamutaasuk’o du̱mbi̱ aaghenda mu munagha ghwabo aanuwa maasi ghoona na ghanji aaghahanja kitiyo-kitiyo. Munagha ghumali̱ye kwoma, mbu̱la yaakwati̱ya yaatandika kutoona. Bu̱li̱ kintu kyatunga maasi ghaabusa.

LUGHEJI-GHEJI LU̱KWI̱TI̱I̱SI̱YAGHA
Mubulya Wilson
Wakaamambo aakelelagha mu mu̱mi̱li̱ ya ki̱tu̱lu̱ kuliya buhuka. Kaamabo waawe akaba ali mu mi̱li̱ ya kiti na bi̱i̱bbi̱mbo bili eghulu mu matai kuliya bi̱ghuma.
Kilo kimui ki̱i̱bbi̱mbo kyasu̱ndu̱ka hansi kukwamilila bu̱ghu̱ma obwalaghalikagha. Obu kyaloli̱ya cininininii… kyabona wa Kaamabo. Wakaamambo naye aabona kiibimbo. Byatandika ku̱bu̱u̱lani̱ya bighendeleluwa . Haala aalu̱ghamu bu̱u̱bhootu̱. Obu byabaagha binali aala bikabona nkala neehi̱ya kandi na mwegha nguhungila kimui. Ki̱i̱bbi̱mbo kiti njala yaamali̱ye kughuwa ki̱tu̱lu̱ kikuhiya na bi̱ghu̱ma bihuw’o” Na Kaamambo ati, “Buhuka bwona na mahuli ghaabuwo byona bikusiilila.” Byona hamui biti, “Kini nkiki!”
Ki̱i̱bbi̱mbo ekyabaagha kili mukiti eghulu kyabilikila kinakyakiyo kiti, “Wai̱ wiise tughende tasanguwe nitwetungila hanji bwile butakaali̱ye. Kaamambo aasobeluwa eesengeleli̱ya bhootu̱ wee kutamu̱ti̱gha. Ki̱i̱bbi̱mbo kiti, “Uwe akusobola kuhalala otali na mapapa? Kaamambo aakuukamu ati, “Obilikile muunakyawe naaye aase asu̱ndu̱ke hansi. Tu̱ku̱koleesi̱ya kati kani. Uwe okalume hani nooli̱ hali nanje nkalume haagati. Du̱mbi̱ muhalale nanje.” Ki̱i̱bbi̱mbo kyabona magheji ghalimu. Kyabilikila munnakyakiyo baakolakuwo. Bi̱i̱bbi̱mbo byahalala na Kaamambo kanalu̱mi̱ye kati haagati.
Obu baabaagha mbanaghenda mbaamali̱ye ku̱ti̱gha nkala neenahiya enu̱ma, Kaamambo waawe aatunga kyeli̱li̱kano. Aaghila ati, akubbala kughambila bi̱i̱bbi̱mbo kyeli̱li̱kano kiye. Obu eesami̱ye ku̱bu̱gha aataasuka haa kati aka aabaagha alu̱mi̱ye. Aasa naalu̱ma aahi̱ka eesekula haa ebaale. Aatikaa-tika ki̱ku̱ku̱. Aakala ku̱hu̱u̱teela. Bi̱i̱bbi̱mbo byaghenda. Kaamambo eesanga ati̱ghaaye enkaha mu elungu.
Obu Aabaagha anali haala abu̱lu̱u̱we kyakukola, aabona kitinda. Aaghila kitinda kati, “Gutu, onkumaani̱li̱ye bi̱ku̱ku̱ byanje obinte haa mughongo. Obisaalile hambali byabheghangu̱ki̱ye. Bikwataane, tooli̱ uwe mu buhuka bwona si̱ye na lubyalo lwanje lwona tatulikuliya bbaa.” Kitinda aaghu̱wa aki̱li̱ye lu̱ku̱, aakolakuwo. Bi̱ku̱ku̱ bya Kaamambo byakwatana.
Ku̱lu̱gha bwile obu niikiyo kyaleki̱ye Kaamabo kaaba na bikpanga-kpanga haa mubili ghwak’o.

BU̱U̱BHOOTU̱ BWA BU̱GHOBI̱YA
Mubulya Wilson
Kigbende na njoka bakaba bali bana bu̱u̱bhootu̱. Boona baakilagha kusanga-sangaana mu kihanda.
Kilo kimui beeli̱li̱kana ku̱ki̱dhi̱lana mu maka niikuwo ab’omu maka ghaabo babamanye baleke kubaaghwi̱la mu bisuula kwonkaha.
Wanjoka oghu aaleeta kyeli̱li̱kano, aaghila bhootu̱ wee ati adhu̱bhe aase amulole. Kigbende aasi̱i̱ma. Kilo eki baalaghaane kyahi̱ka. Kigbende, mukali̱ wee, na baana be babili, baamu̱ki̱ya kughenda kulola bhootu̱ wabo. Obu baaki̱dhi̱ye, baabeebali̱ya kulungi nkwoku. Baabata mu numba haa di̱i̱lo. Wanjoka obu aaghendi̱ye kulola ebi mukali̱ ateekeeye baa bhootu̱ baabo aabona ati ebo bakufweluwa kaakuba babiha baghenu̱ kubiliya bonkaha. Du̱mbi̱ Wanjoka aaghila mukali̱ wee ati, “Etu̱we boona tukuliila hamui, si̱ye ni̱mani̱ye kyakukola. Baasembeja byokuliya. Aaghila mukali̱ wee ku̱ti̱gha maasi ghaa kunaaba mungalo hanja. Aaghila boona hamui na baghenu̱ ati baghende banaabila hanja du̱mbi̱ baase baliye. Ki̱gbende naabe boona baaghenda mbahalalani̱ya kunaaba mu ngalo. Obu baaku̱u̱ki̱ye Wanjoka aabaghila ati, “Mutodhe mughende munaabe nanga musene ghubaasu̱u̱ye mu byala. Baatodha baaghenda niikiyo kimui. Haakumaliilila baasa baasanga Wanjoka na baana be mbaamali̱ye biliyo. Wanjoka ati, “Taghuli musango ghwanje, nanga twobahi̱ye ku̱tu̱neneeleli̱ya byokuliya. Kigbende naabe baakuuka e waabo batameli̱ye na kabheghe.
Obu baatodhi̱ye kusangaana mu ki̱i̱kalo kyabo kya bu̱li̱ kilo. Kigbende aaghila bhootu̱ siye ati, “Ebyasaaye tutabita haa mutima. Gutu wiise otubungile naawe omanye ewanje. Wanjoka aasi̱i̱ma ataasu̱ki̱ye eki aakoli̱ye muunakiye. Kilo baalaghaane kyahi̱ka, Wanjoka naabe baaghenda ewaa Kigbende. Mukaa Kigbende ati eye taakubateekela nanga bakabakola kubhi ewaabo. Kigbende ati, “Eki otakifuw’o nanga magheji taghaba ghomui. Mukaa Kigbende aateekani̱ja kulungi. Baadi̱ni̱ya ntebe syeli̱ghi̱i̱li̱li̱ya meeja eghi eliyo byokuliya. Du̱mbi̱ Kigbende aaghila baghenu̱ bee ati, “Mwise tutandike kuliya, ati kyonkaha bu̱li̱ omui abhonganuuwe kusitama mu ntebe.” Wanjoka naabe baatalibana kusitama mu ntebe baasaaghuwa. Obu Kigbende naabe aniibuwo baneeku̱ma biliyo. Wanjoka naabe baasaaghuwa, aasaaliluwa aaghila ati akubbala kukonda na kumela Kigbende. Nandi Kigbende ati, “Njuke okinge! Du̱mbi̱ Kigbende aatandikil’o ku̱bhi̱mba na kufuuha. Du̱mbi̱ mukaa kigbende aaghila tongaasiye mukaa Wanjoka mu ati, “Ekinkukolagh’o banji siye tambali̱ye bakinkol’o.” Mukaa Wanjoka aaghila ebawee ati bakuuke ewaabo baghende beebbalile kaakuliya batatwikana.

BWESIGHIBUWA BWA MAAJA-MAAJA
Mubulya A Wilson
Musaasa akaba ali na mukali̱ wee oghu ataadheedhuwagha na eba wee. Bu̱li̱ kilo mukali̱ aakalagha naatongani̱ya eba wee oghu. Mukali̱ naabona bakali̱ baanakiye mbateeka mukubi oghu eye atali naghuwo du̱mbi̱ abhenga kuteekela eba wee.
Obu musaasa aaboone butaaghu̱wana busuuye muka yabo, aaghenda eebu̱u̱li̱y’o baanakiye. Baamughila bati eeyegheesi̱ye kutegha.
Nkyambisi aakeelela aakwata eti̱mu̱, buta na mu̱su̱ko ghuwe, eegheleka kidimo kya nsu̱ka. Mukali̱ wee aamubona ataamufuw’o ku̱mu̱bu̱u̱li̱ya. Haa mutima ghuwe ati, “Okakyeha!” Musaasa aaghenda mu ki̱bhi̱li̱ aabona mwaso ghu̱telelu̱ki̱ye bbulu-bbulu. Aasu̱ndi̱li̱y’o biita biye aatandika kulima buhiya. Aabulima na maani̱ ghoona. Aabumala, aabu̱swi̱ki̱la, aakwata byoghi biye aatandika kukuuka e we. Mu̱gi̱sa ghuwe ghulungi atakaki̱dhi̱ye ewe aakoma namikila mu kihanda. Obu aaki̱dhi̱ye na ehu̱si̱ko, mukali̱ wee aasa kumutangilila h’elembo. Aamughuwa mu ki̱ku̱bha, aamujuna ehu̱si̱ko. Kilo eki baaghwesaghila mbeba etaakubaghuluka.
Obu bwakeeye mukali̱ wee aamu̱bu̱u̱li̱ya hambali eso eesaaye. Musaasa aamukuukamu ati, “Kaagona takaleeta ehu̱si̱ko.” Du̱mbi̱ musaasa aamukilamu kukuuka hambali aalaaye ali̱mi̱ye buhiya buwe. Obu aaki̱dhi̱yeyo aasanga bwehuuyeyo. Aaghenda adheedheu̱we. Obu aalangi̱li̱li̱i̱yemu aadingbila, aasanga ntu̱u̱li̱ ya nguwe esukumaanemu. Nguwe yaamughila eti, “Oleke kwobaha, gutu onjiye mu buhiya nkukuha mi̱gi̱sa ya kwitagha bunyama bwona bwa mu ki̱bhi̱li̱ muni.
Musaasa waawe mutima ghutamulimu, aaghenda aajomba bighoye byomiiye nga myeteete na mali̱gi̱, aasa haa mutima ghuwe ati, “Baaghu̱wa akaa mutuwe, kibe-kibe.” Musaasa aaguma masaasa. Aakoti̱ya bighoye mu buhiya Nguwe yaakoti̱ya ki̱ku̱bha kyayo mu ki̱ni̱gho. Musaasa aatandika kubhula. Nguwe yaalu̱gha mu buhiya. Obu yaalu̱ghi̱yemu yaamughila eti, “Waakoli̱ye kulungi kunjiyamu, nguli otaakoli̱ye eki ebyawe byali bihooye.” Yaamughila eti niiyo nkama ya nkama ya ki̱bhi̱li̱ eki kyona. kandi mwaso ghuni ni luguudhe lwayo lukulu. Yaamughila eti eeyongele na maaya bhaatu obu alaatagha kasolo koona akaayaghemu mutima aghu̱ti̱ghaghe haakpengbu̱ nanga niikiyo kilaghilo kyayo. Banabu̱u̱bbhootu̱ bani baalaghangana. Musaasa aaghenda aaki̱dha ataaghambila mukali̱ wee. Nkyambisi aatodha aaghenda kulima mahiya mu ki̱bhi̱li̱ eki.
Obu aaghendagha kwanja mahiya ghee, naasanga kantu keehu̱u̱yemu, akola ngoku bhootu̱ siye aamu̱ghi̱li̱ye. Mukali wee naamu̱bu̱u̱li̱ya hambali mutima ghuli, amukuukamu ati, “Bunyama bwa mu kisaka tabughila mutima.”
Kilo kimui mukali̱ wee aakeela aatuwa niikuwo aghenda aamanya majima ghoonini. Eebi̱sa aabona eba wee naasa, aaghenda amukweme bukee-buke naaneeli̱li̱kana ati, “Nkukulenguula obwalo.” Obu masaasa aahendi̱ye koona ebili, aabuliilila mukali̱ wee. Mukali̱ wee aatandika kukpeeta ki̱bhi̱li̱ kitiyo-kitiyo manjai̱te. Eetu̱lakaka eehuuye mu buhiya butobheeye. Aasaaghuwa kubwehiyamu. Aakpungbaana, aaholi̱ya aatandika kusaba haa mutima ghuwe ati, “Maabileei̱le onganile ondeetele bali̱ye ntalaala muni, obuuni mbu̱la ekwati̱i̱ye. Ki̱tu̱ twabu̱ghi̱ye syaleeta ebawee. Obu musaasa aalangi̱li̱i̱ye mu buhiya, aabona muntu asu̱si̱ye w’omuwe aatandika kutukumila ati kedha aasangaane mu̱li̱mu̱. Naaneebigha-bigha kukuukayo, mukali̱ wee aamughila ati, “Ka mutiima, ni̱i̱si̱ye, gutu onjiye mu buhiya naali nkukweme tankutodha.” Musaasa aalokaka aagomba mu buhiya naanayamu mukali̱ wee du̱mbi̱ nguwe yaaki̱dha. Yaaghila musaasa eti, “Nkimani̱ye ndaghaano yaatu onaghimani̱ye.” Musaasa waawe mahililo ghaamughwila, saghama yaamuumulila mu mubili, mukali̱ aabbala kahulu kaa mu̱sondokoli̱ kaabula. Musaasa aaghila aamutima ghuwe ati, “Musaasa aku̱wa masaasa.” Aamala daki̱i̱ka nga eku̱mi̱ naanaloleesani̱ya mukali̱ wee na nguwe. Du̱mbi̱ na bukali bwa kisaasa aahanga maaso ghee nguwe. Aataka ati, “Bu̱u̱bhootu̱ tabulimu nsonombe, gutu nkukusaba ku̱ntegheleeli̱ya ngoku nanje naadu̱bhi̱ye naaku̱tegheeleli̱ya naaku̱u̱ghu̱wa. Oni ni mukanje, tandi n’onji. Gutu nkukusaba wiise otubungilaghe ewaatu. Bu̱li̱ kwisa otwalaghe mbu̱li̱ eghi eku̱dheedhi̱ye ku̱lu̱gha mu mulonko ghwatu.”
Nguwe taayaakuukamu kantu yaatu̱mana. Mukali̱ na ebawee baatandika kusaba haa mitima yabo baghwesaghi̱li̱i̱ye. Mukali̱ aasabila haa mutima ati, “Ninaaki̱li̱ye buni bali̱i̱ wanje ndamudhootelagha ng’ebeele. Bakaasa kubhali̱ya nguwe etaliyo. Musaasa aaghila mukali̱ wee ati, “Jaau̱ tughende nkoto teeswala, ekiikala gbutu bakilasa etasombeeye.
Eki niikiyo kikulekagha nguwe siita mbu̱li̱ mu maka.

BU̱U̱BHOOTU̱ BWA MUTANI̱I̱NA
Biira Mary
Kandi̱byaladhi̱nku̱we na kigbende bakaba bali bana buubhootu̱. Kilo kimui kigbende aaghila bhootu̱ wee ati baghende balole mamba wee baadu̱bhagha kubhasuka maasi.
Kilo eki baalaghaane kyahi̱ka baamu̱ki̱ya kughendayo. Obu baahi̱ki̱ye haa maasi, kigbende aaheeka bhootu̱ siye e mighongo baabhasuka. Bamali̱ye kubhasuka, batakaseli̱ye, baabona ki̱ti̱na kya mapeela. Mu ki̱ti̱na eghulu mapeela ghakaba ghatu̱ku̱li̱lani̱i̱ye gheeli̱ye dhu̱. Baaghambilana bati badu̱bhe baliye biitanga bya mapeela. Ngoku kigbende ataakusobola ku̱ni̱i̱na, Kandhi̱byaladhi̱nku̱we eehaayeyo ku̱ni̱i̱na. Aabhalaghata kiti kya mapeela. Aatandika kukobha mapeela naanaghaliya ataakulaghali̱li̱ya bhootu̱ wee. Aalu̱gha mu ghuni mutai aaghu̱lu̱kani̱ya mu ghunji nkwoku naanaliya. Kigbende eesengeleli̱ya bhootu̱ wee naye kumulaghaali̱li̱ya akili ki̱i̱bbu̱ne. Aabu̱ghagha naye ng’oghu oti taamu̱u̱ghu̱u̱ye.
Kigbende aaghenda aaleeta byalaagha na mulilo. Aalubha byalaagha mu nti̱na ya mapeela aabyaki̱ya byatandika kwaka. Kandibyaladhi̱nku̱we obu aaboone ebi aatandika kutakangana naanaghila ati, “Gutu oli̱mi̱ye mulilo oleke nkukobhele biitanga. Kigbende aaghenda aatodha aaleeta ki̱ghu̱mba kinji aakigbadhikamu. Kandibyaladhi̱nku̱we aatandika kulaghali̱ki̱ya mapeela gheeli̱ye na kigbende naanakoma-koma kughaliya. Mulilo ghukaasa ku̱li̱ma kigbende naaku̱ti̱ye.
Kandibyaladhi̱nku̱we obu aasu̱ndu̱ki̱ye nsoni̱ syabbalagha kumugenga hansi. Ku̱lu̱gha obu Kandibyaladhi̱nku̱we nsoni̱ sikuukalagha simukwete kandi asusaane na bi̱singo byona bya hambali ali.

EKIKULEKAGHA BAANA NKELEMBE BATAATULA BWANGU
Mubulya Wilson
Hambele baana nkelembe baabu̱ghagha aaniibuwo babyahuwe. Mbaabbala kwonka babu̱gha bati njala ebakwete. Mwana naaluwakaka kuukala alangaaye luhande lumui abu̱gha bamugaali̱ya. Muntu oghu atabbali̱ye ati amulele amubhenga. Bunji-no-bunji baana baabu̱ghagha bintu bitabhonganuuwe. Nga oleke ku̱ndoli̱ya ki̱i̱so ki̱tobhoki̱ye; tambali̱ye kakaakulu kedha kagu̱lu̱si̱ kundela.
Kilo kimui mukali̱ akaba alaaye abyaye. Aakeelela kughenda kwebbalila bukui bwa kweteekeli̱ya. Aati̱gha alangaai̱ye mwana haai na ki̱tu̱mi̱ko. Na haakpengbu̱ ya ki̱tu̱mi̱ko nga hali̱, hakaba haliyo mbigha yee elimu kaa maalo ke. Anali hambali aaghendi̱ye kuseena, mukali̱ muliilanuwa wee aasa kwomba mulilo. Aataaha, aabona mwana balaaye babyaye hambali alangaaye. Mukali̱ aasoga mulilo, aata masese haa kisaka. Aaku̱ndu̱kula mbigha yaakpengbu̱ ya mulilo. Aakolamu aayamu mu̱noku̱ ghumui aaghweku̱ma. Aakwata ghunji aaghu̱hu̱si̱ka mu kahu̱ndo eehingiya aatuwa neeli̱li̱kana ati kani kanali kakelembe munu takasobola ku̱bu̱gha.
Obu mukali̱ aalu̱ghi̱ye mu nkui aatandika kulabba mukubi ghuwe. Mwana oni du̱mbi̱ aamughila ati, “Mukali̱ muuhi-muuhi alamaaye aasi̱ye aasoga mulilo aaghuta haa kisaka, aaku̱ndu̱ku̱la munagha aayamu nyama aaghyeku̱ma, aakwata enji aaghi̱hu̱si̱ka mu kahu̱ndo aatuwa. Obu ni̱na we aaghu̱u̱ye, aamanya oghu mwana akughamba. Aaghenda aamu̱bu̱u̱li̱ya alakaba aaniiye aataahi̱ye mu numba kwomba mulilo. Amani̱ye ati mwana taali n’eki amani̱ye. Aasi̱i̱ma ati niiye aasogi̱ye masese kughenda kwetu̱mi̱ki̱la. Du̱mbi̱ ni̱na mwana oni aaghila ati, “Weesaaye notanga-tanga mukubi ghwanje nangaaki?” Aamu̱bu̱u̱li̱ya oghu aamughambiiye. Aamughila ati, “Mwana oghu aabaagha alangaaye haa kpengbu̱ ya ki̱tu̱mi̱ko.”
Obu mukali̱ oni aaghu̱u̱ye eki, nsoni̱ syamukwata, aaholeli̱yo cai. Mukali̱ oni aalengeesani̱ya ni̱na mwana oni aghendi̱ye haa musili. Du̱mbi̱ aaghenda aahaagha binunguwe aabiseka. Aabita mu musekulo aabisekula, aabikama, aabitwalila nkelembe ya mwana eni. Mwana aabinuwa. Obu nina wee aaki̱dhi̱ye, aasanga mwana naasama-sama atali na mu̱bu̱ghe, naatuwa lukondo lwonkaha. Ku̱lu̱gha obu baana baaleka ku̱bu̱gha aniibuwo babyahuwe.
EKYALEKI̱YE BISOLO BYALEKA KU̱BU̱GHA
Biira Mary
Hakaba aliyo musaasa ali na mukali̱ wee. Bakaba batabyaye kyonkaha bali haa ka basatu. Waakasatu akaba ali mukuwe wee ki̱byala mukali̱ wee. Musaasa oni akaba atu̱ngi̱ye mbuwa emui ya busaasa. Musaasa on taati̱ghagha mbuwa ye eghi hoona-hoona hambali aakaghendagha.
Kilo kimui nga bu̱li̱ kilo, aaghenda mu musili na mbuwa yee eghi, musaasa aani̱i̱na eghulu kukasuula lukui olwabaagha lukasi̱ye mu kitai. Anali eghulu, aaleng’o kudhi̱nga-dhi̱ngi̱ya kiti ati niikuwo lukui lutaasukeyo, lwasaghana. Aalola hansi, aalola mbuwa nayo yaamulola. Aaghila ati, “Kuba wenkaha nkibhi bhaaba. Kibuwa kini nguli aabaagha muntu nguli tampeeleli̱ya kipanga kyanje naati̱ghi̱ye hansi.” Naanaghila ati asu̱ndu̱ke, aaghu̱wa mbuwa yee neemughila eti, “Mukama wanje oleke nku̱heeleli̱ye kipanga.”
Obu musaasa oghu aaghu̱u̱ye aasweka kumanya asweki̱ye, oobahil’o maililo ghaamughwila aatandika kutukumila nanga bwoba, aamanya ati aasangi̱ye mu̱li̱mu̱. Mbuwa yaamukuukamu neemu̱gu̱mi̱ya eti, “Oleke kwobaha. Naatu tuli na magheji nga bantu; kandi ebi mu̱ku̱bu̱ghagha tu̱ku̱bi̱i̱ghu̱wagha byona; kyonkaha tatukubbalagha kubaku̱u̱ki̱li̱ya. Mbuwa yaamu̱heeleli̱ya kipanga, aakonda kitai lukui luwe lwataasuka eghulu. Obu aasu̱ndu̱ki̱ye, kutandika kukondakaka lukui luwe olu, naaneebu̱u̱li̱ya ekyamubonekeeye obwalo. Mbuwa yaatodha yaamughila eti ebi aaghu̱u̱ye atabighambila ab’eka. Yaakala neenamuha makulu eti nankahba bintu byona ebili na bwomi̱i̱li̱ nabiyo ni byabbali̱ye ku̱bu̱gha bi̱ku̱bu̱gha dhee. Bintu nga: noni̱, mbu̱li̱, nkoko, bihuka na binji ng’ebi. Obu musaasa aaki̱dhi̱ye ewe e ka aaholi̱ya.
Kilo kimui, mukali̱ wee aaghenda kuhinga. E ye aati̱ghala na mukuwe wee otabuluuwe mbuwa yee. Mukuwe wee oghu akaba ali na kikoliyo. Banali haala nsoola syatandika kumwis’o naye naanasyasa. Naanatongana ati, “Nguli neekwi̱li̱i̱ye nsoola sileka kumbona-boni̱ya.” Du̱mbi̱ nsoola syatandika kwisila kimui. Obu nsoola syaboone mukaakulu oni tuhongo ntumwibha, Syabu̱gha nga bantu nsighila siti, “Dheka tweliile kibbodhe kini kitakaghendi̱ye ku̱gu̱ndi̱la mu etaka kwonkaha.” Obu musaasa aaghu̱u̱ye ebi nsoola sikwete ku̱bu̱gha, aaku̱u̱mu̱u̱ka na nseko. Mbuwa yaamulola eye ataaghibona. Nseko esi syabbu̱mbu̱la makaikulu oni. Mukuwe ataalekeelela kuseka. Du̱mbi̱ mukaikulu eehu̱mi̱ya ati, “U̱u̱ hu̱u̱! Weesekele tita, siye tamba nimani̱ye ekyanjikaai̱ye munsi muni bbaa. Nguli neekwi̱la mpuumula ndu̱gha mu kubhaaja kuni.” Makamala ku̱bu̱gha kiigambi̱ kya nsoola kyasa.
Syebbutika haa kibhodhe nsighila siti, “Dheka tweliile kini kitakaghendi̱ye ku̱gu̱ndi̱la mu etaka busa. Musaasa aasuka ebi mbuwa yaamughambiiye bali mu kisaka. Mukaikulu aalekeela, obu muhala wee aaku̱u̱ki̱ye aasanga analekeeye. Obu katima kaatodhi̱ye kukuuk’o, mukaikulu aaghambila muhala wee ebyamulehukaan’o byona. Mukaikulu taatodhi̱ye amala kweli̱ ataku̱u̱ye.
Haa lu̱ku̱ baabighambila bantu abaasi̱ye kubaghwila.

NGOKU WAKAME AASWEYE MUKALI̱ WA BASATU
Kyakimwa Christine
Mu kyalo kya Weehiilemu akaba alimu manaabukali̱ oghu beehitilagha kubbala kuswela.
Wakame, Wanjoka na Wantale bakaba bali bana bu̱u̱bhootu̱. Bu̱li̱ omui eeghomba kuswela manaabukali̱ oghu. Baahaana milimo. Wakame aaghenda kuleeta byokuliya; Wanjoka aaghenda kuleeta byalaagha/bilaalilo; Wantale aaghenda kuseena nkui. Boona baaki̱dhi̱la hamui baleeti̱ye ebi bendeeye.
Obu bwahi̱ki̱ye lwagholo, Wanjoka aaghila ati akubbala kuhuumul’o kati̱i̱. Wakame aaghila aghende alangaale ensi ya byalaagha. Wantale naye aaghu̱wa mpongo simukwete. Wakame aamughila ati aghende alangaale haa bwalaagha eegu̱u̱li̱. Wanjoka aaghu̱wa kintu kimutabiliiye kandi kimulyoteleeye. Aatandika kukiluma ati kyangu̱mu̱lu̱gh’o. Wantale aaghu̱wa kintu nkimusuna-suna, du̱mbi̱ aakwata lukui aatandika kuhuulanga byalaagha. Aabihuulanga, aabi̱tu̱wakaka. Wanjoka aaku̱wa. Wantale aatodha aalangaala. Buseguwe bwa Wanjoka bwa mukoma haa mutima aakwi̱la mu mpongo. Wanjoka aaku̱wa na Wantale aaku̱wa. Wakame aati̱ghala na banaabu̱kali̱ enkaha, baaswelana.

KALIMAGHEJI NAASI̱NGA MUGYANO
Mubulya Wilson
Wakamambo akaba ali bhootu̱ sya Wansele hamui na Wanjoghu̱. Wakamambo waawe aaghenda aaghambila Wanjoghu ati akusobola ku̱mu̱singa mu bubhula mughuwo. Wanjoghu̱ aamughila ati Wakamambo naamu̱bhu̱li̱ye akili aku̱ku̱lu̱ka mu kyalo eki. Na Wakamambo aaghila Wanjoghu̱ ati naye Wanjoghu̱ naamu̱bhu̱li̱ye aku̱ku̱lu̱ka mu kyalo eki. Baat’o kilo eki bakubhulangana. Wakamambo du̱mbi̱ aaghenda aaghila Wansele ati taali na maani̱ eye akusobola kumubhula kumuuya mu nanja. Wansele aamughila ati Kaamambo naamu̱bhu̱li̱ye aku̱ku̱lu̱ka mu kyalo eki aghende hanji. Wansele aamughila ati taaliyo muntu munsi muni oghu ali na maani̱ ng’aghe. Baateela mpaka. Baateelan’o kilo kya kukola kamansi̱ngano aka. Wakamambo aat’o kilo kyonini eki baataayo na Wanjoghu̱. Obu kilo eki kyahi̱ki̱ye Wakamambo aaghenda aata mughuwo mu bikiya bya Wansele mu maasi aatodha aaghenda aata luhande lunji mu bikiya bya Wanjoghu̱ ebhimba. Wakamambo aaghila Wanjoghu̱ ati bwile ni bwahi̱ki̱ye akuteela di̱fi̱li̱ niikuwo kubhulangana kutandike. Niikiyo kimui aakaghambiiye Wansele. Wanjoghu̱ na Wansele batamani̱ye apibho ya Wakamambo. Obu bwile bwahi̱ki̱ye, Wakamambo aateela di̱fi̱li̱. Wanjoghu̱ aagangi̱i̱si̱ya kubhulila kimui. Na Wansele mu maasi aakpeeta ki̱si̱yo aagangi̱i̱si̱li̱ya kimui kubhula. Wanjoghu̱ aabhula na Wansele aabhula. Wakamabo ali haagati naanaghila ati, “Weekambe si̱ye tankamali̱yeyo maani̱ ghanje ghoona bbaa, baabhu̱li̱ye baabhu̱li̱y, baaluwakakani̱ya tolo. Du̱mbi̱ Wakamambo aaghila ati, “Tuleke.” Wanjoghu̱ eeganga eli̱ na Wansele eegenga eli̱. Wakamambo aaghenda e waa Wansele aamughila ati, “Naakusaaghi̱ye.” Aatodha aaghenda ewaa Wansele aamughila ati, “Waasaaghu̱u̱we.”

BUTEESIGHANGANA
Mugisa Salapias
Hakaba aliyo Wantale ali na mukali̱ wee baakaaye mu ki̱bhi̱li̱ bonkaha. Wantale aatandika kukwela numba mu elungu haagati.
Mu ki̱bhi̱li̱ omu akaba alimu Wanjoghu naye ali na mukali̱ wee. Bakaba baakaaye bonkaha batamani̱ye ngoku Wantale naye ali mu ki̱bhi̱li̱ omu.
Kilo kimui Wantale aaghenda kutandika kukwela numba. Wantale eesal’o naakwela, akuuka ewe. Wanjoghu̱ atunga kyeli̱li̱kano kya kukwela numba. Naanaghenda kubbala kibanja kisemeeye kya kukwel’o aasang’o numba eghi eli makweluw’o, atandika kughikwela. Obu Wantale aatodhiye kwisa kukwela numba yee aasanga bongeey¿o mulimo ghunji. Naye aatodh’o ghunji. Wanjoghu̱ obu aatodhi̱ye kwisa aasanga mulimo ghweyongeeye kusaali̱ya hambali aaghu̱ti̱ghi̱ye. Boona baakwela numba bataakusanga-sangaana. Numba yaahuwa bu̱li̱ omui aaghenda kuleeta mukali̱ wee kutaaha.
Wantale aasa aataaha mu kisiika kimui. Wanjoghu̱ naye aasa, aasanga Wantale ataahi̱ye mu kisiika kimui naye aataaha mu kisiika kinji. Numba eghi ekaba elimu bisiika bisatu. Ekyakasatu kyafooka bubiikilo.
Wantale na Wanjoghu̱ baaba bana mukagho. Baatandika kughenda kuhiigha hamui. Wantale aakaatagha bunyama Wanjoghu̱ abuheeka. Niikuwo baakatu̱u̱ye batiyo.
Kilo kinji baatodha baaghenda kuhiigha, Wantale aakola ghwa kwita na Wanjoghu̱ aakola ghwa kuheeka. Mbanaasa baasanga nsenge sili mu kiihamba nsinaaba. Wantale aalu̱tu̱kana aatali̱ye nsenge ntu̱u̱li̱ ekofi̱ limui yaakwi̱l’o. Wanjoghu̱ aadheedheluwa kimui, aaghila Wantale ati kumanya nku̱si̱i̱mi̱ye nkukuheeka hamui na nyama waati̱ye sini syona.” Wanjoghu̱ aakola kuwo.
Obu baaki̱dhi̱ye e ka, Wanjoghu̱ mukilo aaghila mukali̱ wee ati baku̱lu̱ke nanga Wantale asaakaaye, akutali̱yagha kisolo ki̱kwi̱l’o, ataliisa abatali̱ya naasaaluuwe. Baabiboha mukilo baaku̱lu̱ka. Ki̱i̱se Wantale nabo baaku̱lu̱ki̱ye mukilo nanga Wantale kughambila mukali̱ wee ati, “Wanjoghu̱ ali na maani̱ akuheekagha bisolo baati̱ye byona atodha aheeka naye Wantale. Boona baaku̱lu̱ka, baati̱gha numba yabo batiyo.

Magheji Ghasaiye Maani
Nkabandinabo Amosi

Kilo kimui Wakame akaamuka aaghenda ewa Wa Wankoko.Wakame aghila nkonko ati oneholiye silingi bitaano, Wakame atodha aghenda ewa munyelele eholayo silingi bitano binji, taheleye ala hooka, atodha aghenda ewa mbuwa eholayo silingi bitaano, Wakame wawe taheleye ala, eghenda ewa nguwe eholayo silingi binji bitaano, atodha aghenda ewa mupolisi eholayo bitaano dhee. Obu Wakame amaliye kuyo bantu aba boona sente syabo mumulingo ghususiye ghutiyo, abaghilila ati enuwe boona mwise mbasasule kilo kyakataano. Wakame amaliye kubalaghisaniya atiyo, boona bakala balindililiye kilo eki kuhika. Wakame wawe obu aamaliye kutunga sente esi aaghenda aghulamu kacooli. Kilo kyakataano obu kyaikiye, Wa aakeela kumuka cui-cui yaaghenda ewa kaWakame, Wankoko aghila ati kodhii …. Wakame akaba makaghuwa, aatuwa munumba, amwebaliya ati weebalee wamaaha, saha eghi Wankoko aaghila Wakame ati siye tinasiye kusitama kedha kulebba eni, oyo nkubbala sente syanje. Wakame amughila ati ai Wankoko, eki bakukiighuwa batiya ngu waalughiye ewanje otanoye twisi!!, sitaama odubhe onuwe kikopo kya buusela. Wankoko yasitama yatandika kunuwa, neenanuwa, ekalangiya nsyaleta munyelele, munyelele ateela kodhi Wakame namughila ati tulimu eee munyelele, dumbi Wankoko aahababuka aghila ati obwalo nisiye bikuwa. Abulya Wakame ati oghu niye ani? Wakame amughila ati taali munyelele, Wankoko amughila ati gutu ombise, Wakame amghila ati otahe ebukungwisi eghi webiseyo Wankoko ebisa, dumbi munyelele ataaha aghila Wakame ati ompe sente syanje Wakame amughila ati sente syawe siliyo, obanje onuwe busela. Munyelele asitama atandika kunuwa busela, munyelele naananuwa, aabuliya Wakame ati nandiki oli matabuka, obu nasagha naaghuye noobugha na muntu. Wakame amughila ati munyelele holiya!! Manti ni Wankoko ebiseye eghi.dumbi munyelele gwahanja busela, ghwatahilila Wankoko ghwaghiliya, ghwakamaliye kuliya Wankoko eghi, ghwatandika kusiima Wakame, ngunasiima, mbuwa yabbuduka, nayo yateela kodhi, Wakame aaghyebaliya, nandi munyelele bwankiyo! Wakame aghughila ati otahe bukugwisi eghi, mbuwa yataaha munumba, nenataha yaghila Wakame eti siye tindi halugheji-gheji lwawe olu, ompe sente syanje. Nikiyo kimui Wakame aamughila ati banja onuwe busela yasitama yatandika kunuwa, neenanuwa yabuliya Wakame eti nandiki wai watabukiye huwe kubughagha wenka? Obu nabbudukagha mwelembo, naghuye nobugha na muntu buye uwe watandikiye kubugha wenkaha? Wakame amukukamu ati holiya mbuwa, manti nimunyelele nabughagha naye, mbuwa makughuwa eki yaahanja busela yatahilila munyelele yaghuliya yatandika kusiima, neenasiima, nguwe yabbuduka nayo yatela kodhi, Wakame aghila ati nguwe tulimu eee, mbuwa obu yaghuye eki yahababuka, nayo Wakame naghisindika nambali akusindikagha bili, nguwe obu yatahiye munumba yatabukilala Wakame enti ompe sente syanje otasimpaye okumbona obwalo Wakame amughila ati aaai nguwe uwe nankabha kusakala, obu takili kyansoni kutuwa munumba yanje otanoye maasi? Sitama obanje onuwe kikopo kya busala. Nguwe eghi yadhoota yatandika kunuwa busala. Nenanuwa, nayo yabuliya Wakame eti obu nabbudukagha mwelembo, nganaghuye nobugha namuntu, nandiki kegha kali makusalilamu wai? Wakame aghikukamu ati holiya manti nkwete kubugha na wambuwa. Nguwe obu yaghuye eki yahanja busela yatahilala mbuwa yaghiliya. Nguwe nenasiima Wakame, ghaleta mupolisi ambaye mbunduye, aatela kodhi Wakame amwebaliya ati tulimu eee, obu nguwe yaghuye ali mupolisi yatukumila, yebuliya eti nkoleki? Wakame aghisindika nambali ekisindikagha bili. Mupolisi aghila Wakame ati otampaye sente syanje, nkukwita edindi. Wakame amughila ati aaai tita dubha odhudhukane mutima, sente syawe siliyo. Odube onuwe busala. Mupolisi atandika kunuwa. Nibuwo abuuye Wakame ati obu nabudukagha mwelembo, naghuye nobugha nanuntu buye watandikiye kubugha wenkaha? Wakame amughila ati holiya tita, taali nguwe nabughagha naye. Mupolisi obu aghuye eki, aghila ati natebiye obwalo. Aghitahilila aghilasa, aghila Wakame ati wansasuye nkutwala luhu lwa nguwe eni. Haabwamagheji bantu aba boona Wakame akabasasulala mukilo kimui eki. Buli muntu asasuluwagha mumulingo ghuwe.
Munyelele bakaghusasula Wankoko ghwadhedhuwa, mbuwa baghisasula munyelele yadhedhuwa, nguwe baghiha mbuwa yadhedhuwa mupolisi bamuha nguwe adhedhuwa.
Wakame amala ebanja liye habwamaghejighe.

Lughanda lusaiye bubhootu

Akaba aliyo musaasa omui liina liye bakatwelinga, aabhotanuwa na bhootu siye liina liye okakyeeha basaasa babili aba obu baamala kubhootanuwa, musaasa bakatatwelinga aaghila ati kutandikila noobwalo timaniye lughanda lwanje lunji, oy’o bhootu syanje oni oghu bakughilaghamu okakyeeha. Dumbi bwile obu bwonka, bakatwelinga ooha nganda siye eekumbulagha aataboona no mui hali abentula yee, aaboonagha abentula yee maso kwanguwaaakaluka muntulaye aaghenda aakala hamui na bhootu siye. Bakundanila kimui. Kilo kimui bakatwelinga, oghu aalenges’o bhootu siye oghu, aata mbuli, aabooha muku ghwayo musiti nga muku ghwa muntu, aaghuheeka andingandinga y’o mukilo, aaghenda ewaabhotusiye, amughila ati , bhootu syanje oomuke bwangu oose okoonele natungiye kijibu natiye muntu onjoleke nambali nkumujiika. Bhootu siye obu aghuye kighambo kya kwita muntu, aghila ati, okilole kidhoomadhoma kini, nisiye nakutumiye kwita muntu? Okubbala kuubhuliila makulu? Amughila ati siye tandi nambali nkukuha hoona hona kujiik’o muntu wawe waaghendiye kwitila busabusaane. Genda eli. Bakatwelinga wawe bhootu siye amaliye kumughila atiyo, aliiso amubhimba, atoodha amugbondel’o. Niibuwo bakatwelinga aatodhiye aheeka muku ghwa mbuli eghi aaghenda kulengesa wa niinawe, liina liye bulimpik’o, amubilikila, waniinawe aamuka amughila ati mana wamaha natiye muntu ose onjoleke nambali nkumujiika bwile butakakeeye nanga bantu bakimanya. Bakatwelinga amaliye kubugha atiyo, waniinawe balimpik’o amughila ati omaniye enuwe bubhootu bukubasaliliyagha lughanda. Buye wai bhootu syawe takuhemukila!. Siye timbaliye okuwe. Oose nkwoleke nambali okujiika muntu wawe watiye. Ala niye bakatwelinga aghiliye ati kiise lughanda lusaaiye bubhootu. Namaliye kuboona bhootu syanje na lughanda lwaaje oghu aagugubha kunkwila. Nibuwo aaghambiye waninawe oni ati ghuni nimuku ghwambuli niheekiye taghuli muku ghwa muntu bbaa. Tuliye hamui enyama sini. Kuluughilila obwalo, bubhootu tabulitodha kunjohiiya na lughanda lwanje. Lughanda ninkolu.
Kyahandiikuwa na
Nkabandinabo Amosi

Ekyalekiye mbuwa syaleka kukoonela bantu
by Rev. Timothy bandirana

Ambele na mbele mbuwa syakoonelagha bantu. Kilo kimui mulyanyama aaghenda kuhiigha, aatila kimui nyama sikani̱ye. Bwile bwakulughayo obu bwahikiye syamusaghisani̱ya kuheeka. Aakola ghali na ghali bhaatu byasaghana nanga bisolo ebi aatiye bikaba bikani̱ye. Mulyanyama oni magheji ghamuhuwa mumutuwe, mbuwa eyo yakalagha emuloli̱ye nanguki akwete kuboonabona. Nibuwo mbuwa yamughiliye eti nkuba makakukoonela edindi okuhika kughaha mukali wawe nanguki nakukooneye ti̱ takutodha kumela kabheghe aka ala. Musaasa oni akaba makaghuwa kitekelejo kya mbuwa kini, aghilahila ati nanguki natighala neeka tansobola kubugha bbaa. Gutu uwe ookoonele. Mbuwa yamughambila eti obohe mahusiko abili, lyawe limui na lyanje limui. Musaasa oni nikuwo akakoli̱ye. Mbuwa yaheeka na musaasa aheeka baasa baakidha ekaanu̱ma sya numba yabo mbuwa yasi̱su̱ndi̱ya dhumbi̱ musaasa oni abilikila mukaliwe kwisa kumukwati̱si̱ya kusi̱tahiya munumba. Niibuwo mukali oni aboone bisolo bi̱ku̱u̱ye bikani̱ye kimui, abuli̱ya musaasa we oni ati uwe sini syona wasihekiye otiya mu kisaka kusihikiya hani? Musaasa amughila ati nasisombeleeleye ninasita hani kuhikiya obu nasimaliyeeyo. Mukali aholiya abhenga kusiima eki baliwe amughambiye. Ekyalughiyemu abhenga nakuliya ha nyama sini syona. Niibuwo baliiwe amubuuye ati dhaani ekilekiye otaliya mbiki? Mukali amukukamu ati nanga wabhengiye kungambila oghu akakuheekesi̱ya bisolo ebi byona mukisaka. Nibuwo amughiliye ati ndi amakughambila bhaatu otalimughambila nanga ambonamu nga muntu wa bisu̱bha. Nibuwo amughiliye ati mbuwa yanje eghi niyo yampekeseeye yaghila eti ntalikughambila mukali aghila baliiwe ati tisobola kubugha bbaa, nguli waikiye kungambila nanguli nyama sini syona syasaye!!
nkyambisi cui-cui mukali atandika kweehelela ha ka ye, akaba amakahika mu jikoni akasanga mbuwa yeekatiye mu kitumiko kiye, dheka aghihuule lweheleeli̱yo mu kikubha aghila ati wekatiye mukitumiko kyanje nangaki? Olole na nguki wahanjagiye kibu mujikoni, okunkolagha otiyo nangaki? Wagu̱bha kuheeka nyama mu kisaka kweheelela nikuwo kulakusagha? Mbuwa yamanya nanguki musaasa oni abughiye eki ya mughambiye eti atalibugha. Kulugha ala mbuwa tekatodhagha kukonela muntu nanga bisubha biye.
bhawai mukali otalimughambila nsita, nanga bakali tibabika nsita.

Bandirana Timothy

MAMANO GHAGOLIYE TAGHAMANA KUKUWA
by Kabaghenu annet
Akaba aliyo musaasa omui, li̱i̱na liye ntaaghuwa ali na bakalibe babili, omui bamughilamu kighonge nonji mbamughilamu kinobole. Bakali aba batandika kubyala baana baabo, kighonge abyala mwana wa busaasa na kinobele abyala mwana wa bukali, nibuwo musaasa oni abilikiye bakalibe bani nambali ali, abaghila ati bakali banje enuwe muleke mbaghambile bhawai, siye tandi na musaala ghwona oghu nkutungagha kulugha mu gavumente, oyo musaala ghwanje ni nsuka na muholo. Du̱mbi̱ bakali be bamughila bati twaghuye ebi wabughi̱ye, uwe okwate muholo ghawe otuteemele. Musaasa oghu atandika na kutemeela kighonge, nanatema, mughenjiwe amughambila ati ntaghuwa, bhaatu wasobeeye, na nguli wabanjiye otemela oghu ali na mwana wa busaasa. Ntaaghuwa amughila ati uwe omutemele nanga uwe tokumpambilija bbaa, siye nkukola ebi mbaliye. Eye kinobele atandika kukola mumusili ghuwe, aahela kooko ye ataamu na mucele ghuwe. Mucele ghwa kinobele oghu ghwelela kimui. Bhaatu kisaka kya kighonge kyakwata kyaba kiibhaafu kya musagha kukola, nambali ali nakoliye, asaghuwa kukokobhoho. Bhaatu kinobele akahulula mucele ghuwe oghu mumusili aghughuliya ayamu sente syakutwala mwana we mu sukulu nukuwo atandike kusoma, na sinji asiha baliwe ahaamu musolo. Bwile butaseliye kooko ye nayo yatandika kwaana, obu yeliye aghikobha, aghighuliya, sente ahiyemu aghulamu mabhati ghe ekwelela alugha munumba ya busolu eghi yamutonelagha mbula yakatonagha. Kighonge eye akalagha alindililiye aka baliwe akuleeta, ekyalughiyemu baliwe amubhinga nanga akabona atali na mughaso oghu akumukidhiliya mukaye. Kwesi mukali otakalagha ositamiye kwonka, oti siye ndi mukamakali, eki basaasa tabakibhaliye bbaa, baghonjiye mukali oghu akwekunakuniya, oghu niye akulindagha maka.
eki nikiyo kyalekiye naghila nti mamano ghagoliye taghamana ku̱ku̱wa.

MIGHASO YA BAANA BAA BUKALI
by Katusiime julius richard
Akaba aliyo musaasa aswela bakali be babili, bakali bani batandika kubyala baana baabo, du̱mbi̱ mukali omui akala kubyala baana baabukali bonka, nooli naye atandika kubyala baana ba busaasa bonka, oni mukali oghu akabyala baana baabukali bonka, abbala kwenigha ati nanga muyawe akumusekeelelagha ati eye abyaye bigbende byonka. Bukiya kilo kimui, bantu baamubhili bamutanga bati ateenigha nanga kubyala baana baabukali nkisembo kyawe luhnaga akuhaaye, oleke muuya wawe eye akusekelele. Bhaatu obu baana baamuyawe bakuli̱ye, bet¬u̱wa elungu, boona baba basuma kandi nibo babagha baana baamukali kighonge, aboobukali bali baakinobele, kandi bakaba babetamuuwe bati mbigbende. Bwakiya kilo kimui baana ba kighonge abeetu̱ye elungu kedha kuba basuma ha mubhili, baasa batwala bintu byesebo byona byona, esebo atatighaliya na kantu koona byona babitwala. Baana ba bukali aba baghilaghamu bati mbigbende, ebo basweluwa kulungi mu babali̱ baabo. Du̱mbi̱ esebo atodha abeela kimui mugu̱dha oghu ali nabintu bikaniiye kimui nanga baana ba bukalibe bani. Kyakiya kilo kimui abilikila bantu boona bamubhili, abaghila ati; bhaawai, kiise nabaana baabukali nabo bali namughaso, nanga siye nguli tandi na kantu bbaa. Nibo baleka natodha kuba na bintu bikaniiye kimui. Obu abobusaasa banjibhiye, bamaliye kwetuwa elungu. Aghila bantu bani boona ati mulolelele baana banu babukali byani nanga nabo bali na mughaso byani-byani.
kasumi kamusaasa oni kulugha munsi kahika, aghambila bantu boona ati ka yanje eni naghitighila baana banje baabukali nanga nibo bankumaniye bambonamu kabuntu, nabweki byona ebili hani, byona mbya baana banje baabukali nanga niibo bampaye byona ebi nkali nabiyo hani. Abobusaasa tabaliyo nakantu bbaa nanga baketu̱wa elungu, oleke bakale mu busuma bwabo, ka yanje eni naghitighila baana banje babukali baghilinde bonkaha nanga nibo bandiyo mughaso ghukaniye.
ka ya lindu̱wa baana ba bukali nanga ba busaasa kwefoola bijama-jami.

Mukali̱ taaghila bwesi̱ghi̱bu̱wa
by Rev. Timothy bandirana
Kilo kimui bakahuwa, akaghambila kabundiira ati mana-maaha mukali̱ taaghila bwesi̱ghi̱bu̱wa bbaa. Noobbala oti kintu kyawe bantu bakimanye bakaniye, okighambilaghe mukali. Kabundiira akabuuliya bakahuwa ati ekikubakolagha kitiyo nkiki? Kuni mbaatu bakuliye. Bakahuwa amughila ati mutima taghukusundukagha mukali munda atakabughiye eki aghuye kedha eki aboone akukalagha nalibalibuwa kubugha eki aghuye kedha aboone. Bighambo ebi kabundira akabhenga kubighuwa, abyeta bisubha, kuhikiya obu ahikiye ha bwile buwe bwa kuswela, aswela mala basenge. Nibuwo kilo kimui atekelijó eki bakahuwa amughambiye ati mukali taghila nsita, aghila ati dhaani oleke ndole mukali wanje oni naye akakuba asusiye owa bakahuwa oghu atakughilagha nsita.
Akakeela aamuka aghenda bundiwelume, eyalisiliyayo bwile, akidha nga saaha mukagha syeekilo ha ka ye, akasanga mukaliwe namaliye kughwesaghila. Aghenda ajomba kimangbogbo kyakisumba, akiboha mu siiti ghwasusa mu̱ku̱ ghwa muntu, nibuwo abilikiye mukaliwe mu bukee ha di̱i̱li̱sa ati mukyala mukyala, onjighulile natungiye kijibu, wise olele, otuwe bukee bantu bataghuwa. Mukali oni akaba makatuwa, makabheluma nambali baliwe amiliye akabona mu̱ku̱ ghwa muntu, mukali maghila ati atake musasaasa amukwata ha munuwa, amughila ati uwe okubbala kunjitisiya nangaki, tomaniye ngu bantu mbaghuye nolila bakwisa edindi kutukita, nakutubuliya ekikuleka nolila! Mukali oni akala kutukumila, nibuwo musaasa amughiliye ati oghende ondetele nsuka nilime kituulo nijike muntu oni bwile butakakeye nanga bantu bamanya. Atandika kulima kituulo, akimala ajika kimagbongbo kini, aswikila kulungi, baghenda balangala. Musaasa aghambila mukaliwe oni ati gutu otalighambila muntu weena. Mukali aghila baliwe ati uwe siye nanje nkuba ndi musile kubugha bintu bisusiye bitiyo ebingukwitisiya.
bwile bwakiya, musaasa ategheleliya ataghuwa kantu, nakilo kinji bwakiya ataghuwa kantu koona kyahika ha kilo kya kasatu ataghuwa kantu koona. Atandika kughila ati kiise bakahuwa akamuha bisubha. Nibuwo kilo kimui saaha ena sya nkyambisi musaasa acuyemu kutaliya mukali we mbabunana bigbanga bitekiye, atodha amusamba, amuhuumila, mukali atandika kutangana nabilikila bantu ati baase bamukoneele. Bantu bakaba makidha musaasa ekambila kimui kumuhula nikuwo agu̱bhe kubugha nsita eghi abikiye. Akaghuwa mukali naghila ati enuwe bhawai muleke kundolelaniya oni akubbala kunjita nanguki atiye oli eso limui. Mulangiye nambali amujikiye. Du̱mbu̱ kabundira aleka kuhula mukaliwe nanga eki amubbalaghamu akitungiye eki bakahuwa amughambiye. Bantu bakaba makaghenda nambali mukali aghambiye, majima bakasanga kituulo kiliiyo. Du̱mbi̱ mbakwata musaasa oni mbamuboha bati kwesi niwe okwitagha muni bantu, obwalo nawe oku̱ku̱wa, oyo oleke tudhubhe tumanye oghu watiye.
Batandika kujukulula muntu oni oghu ali mukitulo. Bakasanga kili kimangbogbo kya kisumba. Bamubuliya bati okakola bini nangaki ? Nibuwo abaghambiye eki bakuhuwa amughambiye ati mukali tabika nsita. Naghonjagha kulola majima ghakiyo ti̱, naghaboone. Musaasa oni bamulekela aghenda ewe eka.
bhawai otalighambila mukali nsita yawe eghi otabbaliye bantu kumanya.

Butaaghuwa bukwi̱ti̱si̱yagha
by Rev. Timothy bandirana
Mbambali ekakola bubhootu bwayo na nkeme, buli kilo mbamabali yasagha kulola nkeme nambali ali, nibuwo mbambali aghambiye nkeme ati wai bhootu syanje, nanje nkuleka kwisa ewawe, nanga uwe nawe tokwisagha kundola nambali nkukalagha. Nibuwo wa nkeme amukukiyemu ati siye nanje nkubbalagha kwisa nambali oli, bhaatu ni siye takugu̱bha kwisa eghi nanga bakughilagha bati ewawe aseliye.
nibuwo mbambali yaghambiye wa nkeme eti wise siye nkukuha tulasipoti.
Kilo kya wa nkeme obu kyahikiye kya kughenda, mbambali yasa yatulumula kawiiji yakahikiya nambali wa nkeme ali. Nkeme yakakwata yatandika kukekuniloho buke buke, mbambali ekaghuwa lugho luwe ndwatandika kudhinga dhinga, yakimanya nanguki bhootu siye asiye du̱mbi̱ aghenda kumutangilila mu elembo nanga mbambali eyo ekweela ha gu̱u̱li̱ ya njwenge sya mukusa. Nibuwo nkeme yaabbudukiye mwelembo. Mbambali amweebaliya kau-kau. Nkeme yaghambila wa mbambali eti wai ni siye njala edi kubhi nasiye ntakaliye katu koona. Nibuwo mbambali yahuuiye kikusa yaghambila wa nkeme eti wise odubhe oliye nikuwo tughende. Nkeme wawe akaba makaluma kaghuma ka kikusa, akaghuwa bunuli mbwa museseka mukanuwa. Nkeme yabughila ha mutima eti siye nkutuula hani nanga niye bintu bisemeye bili. Nkeme yaabu̱li̱ya mbambali eti, kulugha hani kuhika ewaawe anaseliye? Mbambali yaghila eti bbaa, eni yoona ni ka yanje. Nkeme yaghambila mbambali eti dhaani si̱ye ontighe hani. Kani kananu̱li̱ye mbambali yaghambila wankeme eti ndasagha kukulola nanga hani taaliikiyo kikalo okukalamu bbaa. Mbambali ekaba makamala bilo bibili eghendiye, na mukama wa mukusa naasa kuyamu mughanulo. Natandikila nambali bhootu syambambali ali hoonini. Mbambali akaghuwa muntu ali akujomba mukusa, akaasa nali̱gi̱ta akasanga bhootu si̱ye wankeme anali mukikusa batakakijombiye. Aghambila wankeme ati bhootu syanje wise tughende olughe hani nanga mukama wamusili ghuni atandikiye kughuliya naboone hanji nambali tukukala kulungi. Nkeme aghambila wa mbambali ati ekidhani nimalilile kani. Mbambali atodha aghambila wankeme ati wai bhootu syanje, mukama wa musi̱li̱ ghuni natodhiye kwisa, niwe akutandikil’o, nkeme yakukamu eti olindoho kabhii ekidhani nimalemu tuni. Mbambali yatu̱wamu kukala elindililiye bhootu si̱ye wankeme. Nkyambisi cui-cui, mukama wa musili aasa kukola, atu̱wamu kudhubha kukobha mukusa nikuwo akolaghe ngunahiya. Wambambali akaba makabona mukama wa musili akwete mupanga aasa aghambila wa nkeme ati wai otuwe mukama wa musili asiye ti̱ niiwe akutandikil’o. Nkeme yaghambila mbambali eti ekidhani nimalemu tuni. Mukama wa musili anjomba kikusa eki nkeme elimu yatodha yakuuka hansi nambali yalughililiye neesa ewa bhootu siye mbambali. Mbambali aghambila nkeme ati hati oli hansi, olughemu otakaghendiye mu maasi ghatu̱mi̱ye, nkeme yaghila eti oleke dhani ni malemu tuni. Mukama wamukusa aasa atandika kukubhongola mukusa kughuta musafuliya, mbambali yaghambila nkeme eti hati wamaliye kukuhika musafuliya olindililiye kukuta ha mulilo. Nkeme yaghambila mbambali eti ondinde hala ekidhani ni malemo tuni. Mukama wa mukusa aghuta ha mulilo, mbambali abona bhootu si̱ye nakughenda kukuwa, ekuba musafu̱li̱ya aghambila wa nkeme ati wai dhoo ghuni nighuwo mulundi ghwa kumalilila. Hati bakutaye ha mulilo, bhaatu nkugu̱bha kukuyamu ni wanasi̱i̱mi̱ye, nkeme akukamu mbambali ati ekidhani ni malemu tuni tunanuliliye. Mbambali ekaghuwa maasi nga tandika kutuuma. Du̱mbi̱ eyo yalughamu. Wa nkeme waawe akaghuwa maasa ngatandika kugbotoma, amaghila ati atuwemu, maasi ngaghibimbila ha mutuwe. Nkeme neekuwa nanga butaghuwa bwayo.
nabatebeji ba luhanga nikuwo bakutughambilagha batiyo bati twekukemu bibhi byatu, etuwe tukala ntunabahakaniya, kiise na luku lutuli hai-hai tulindu̱wa tukuwa tutakahikilije yesu kuba mujuni wa bwomili bwatu. Akaghila ati niiye kihanda, majima, na bwomili. Oghu ataghu̱ye ebiye takwika ewa luhanga.

Wankunga na bhootanuwa na kiikakala (kikui kyomiye)
by Balyebulya B. Peter.
Wankunga mu biti bwile buwe bwona. Kilo kimui, wankunga aghambila kiikakala ati wai siye nkubhootwana naawe, kyonka obu ndiba ninkuwa nkubbala tukuwe naawe hamui. Nandi kiikakala ati wai, siye okunsobola kweli? Nandi wankunga ati wai ni siye nkukusobola nanga etuwe boona tukukalagha mu biti. Du̱mbi̱ ala basiima kubhootanuwa. Busala bwedha, bahiighi batandika kuhiigha mubhenda, nandi wankunga ati wai tinakughambiye nti tubhootwane nawe tooli tulikwila hamui!!, nandi wakiikakala ati mmajima. Abahiighi baghenda mumaaso na kuhiigha, tibabhungiye kuboneelana wankunga, du̱mbi̱ mbatandikilo kuhigha wankunga oghu natandika kubhaka-bhakila bikpaata-kpata bya biti. Nibuwo yabhakiye kiikakala, kiikakala eki kyatyoleka kyehuula ha nsi nenkunga hamui. Du̱mbi̱ bahiighi baasa baghilasa yaku̱wa baheeka mu̱ku̱ ghwayo baghutwala eka. Ekyalabhiye eki kukaba kubbala nkui sya kutumikisi̱ya nukuwo bababe nkunga eghi, du̱mbi̱ batandika kubulani̱ya bati buye tukuyaha nkui? Nandi oli ati tooli obu twahiighagha nkunga eni kikakala ngakyakpoolekiye kyehula hansi, du̱mbi̱ ala naala baghenda kuseena kikakala eki bakileta eka kukitumika. Nandi wankunga nandi wa nkunga ati tinabughiye nti tubhootwane kandi tulikuwa hamui. Obu batumikiye mulilo, baghileta kughibaba, nandi wa kikakala ati ghani ghabaye majima, twasiye twakwila hamui bhaaba!!!
Nkatigha wa nkunga na kiikakala boona bali mu muliilo, si̱ye naalughayo. Bubhootu bwabo niikuwo bwabaaye butiyo.
kighano helela.

Musaasa tandikuwa
by Batalingaya Andrew.
Akaba aliyo musaasa liina liye tandikuwa, akaba ali na myepanko mu maaso gha luhanga. Musaasa oghu eghilagha ati eye taliku̱wa. Musaasa oghu akaba ali mugu̱dha kandi ali na bintu bikani̱i̱ye kimui. Eye nsambo eghi yamukalagha mukanu̱wake bwile bwona. Kighambo eki kyatama luhanga wo mweghulu, nibuwo abuuye malaika we ati musaasa oghu liina eli akalyetoho nangaki? Luhanga atuma malaika we, amughila ati oghende oghambile musaasa tandikuwa oti akukuwa ha kilo ekikulabha kya munkiya saaha mukagha sya ntangali. Obu malaika aghambiye tandikuwa ebi luhanga amutumiye, du̱mbi̱ tandikuwa waawe eyunga munu-munu.
Kilo eki musaasa oghu aghambila mukaliwe ati wai siye ndi maluka lu̱ku̱ kandi timbaliye kilo eki kinsange hai-hai. Du̱mbi̱ ataha mumotoka aghenda.
Musaasa aghendele kimui-kimui na mbali ha seliye, na lu̱ku̱ lwa saaha mukagha bamulaghisaniye naluwo lwatandika kwesukana hai-hai. Tandikuwa nambali anakughenda aghuwa aluwakakiye, atuwamu kuhumula, du̱mbi̱ mu hoteli kuliya. Bwile obu bukaba buli bwa nkyambisi saaha emui ya lwagholo.
Tooli obu amaliye kuliya, atodha atandikilo lughendo mukilo omu. Musaasa akala naalubhatanga kuhikiya nkyambisi saaha ena. Ala ahuumula ataaha mu hoteli kuliya, bhaatu nanalola ha saaha ye.
Ha saaha etanu atodha atandikilo lughendo luwe, tandikuwa wawe akimanya ati atighiye lu̱ku̱. Musaasa atodha eyongela kughenda kwise mu maaso ghe koona eliyeeyo.
maghila ati elinge koona eghi, kiise mu maaso ghe aliyeyo motoka namulito eli ha mwena. Akaasa kughila atiya nahuumiye motoka. Du̱mbi̱ tandikuwa wawe na kuwa. Sikaba sili saaha mukagha esi bamulaghiye kukwilamu.
du̱mbi̱ nanje naalughayo.

Busuma nkalimu
by scola baguma
Akaba aliyo musaasa omui mu kitwike kya nyangasa, liina liye kyaala. Akaba ali na muhala we liina liye mangadha. Nina mangadha akaku̱wa, mangadha anali na meeli musanju ghonka gha bukulu.
kyala akabonabona na mangadha kumuhikiya mukigbo kyakabali. Mangadha akasweluwa Nyahuka mu kitwike kya bulileehe. Kyala oghu atu̱wamu kughenda kulola muhala we nambali aswewe, bamutangilila kuteghiye muhala we adhedheeluwa kimui nanga esewe niighuwo ghwabagha ghuli mulundi ghuwe ghwokubanja kumubungila.
bu̱tu̱ku̱ bwokumusembejela biliyo bwahika bamusembejela baghala lwighi. Ala kalimu kabusuma kanina musaasa aleka biliyo mukisiika kya muhala we nambali asangiye etimbi atuwamu kukolamu, kiise ntamanya nsyano ya buhunga elimu, yamusesekela ha kooti ye yoona, yaba njelu dhiiyo. Musaasa oni aghuwa ahemukiye munumba ya muhala we. Du̱mbi̱ atuwamu nali̱gi̱ta, bantu batandika kwebulani̱ya bati kini nkiki mukuwe kutuwa munumba nali̱gi̱ta? Muhalawe makaghenda munumba akasanga etimbi liiye litwikiye, nsyano ya buhunga ehanjagukane mukisiika. Naye atandika kulila. Ekyalughiyemu buswele bwaku̱wa ha bwa kihemu eki esewe akoliye munumba ye. Bhawai, busuma tabusemeye bbaa. Kandi babyaye, lusuma na luwo talusemeye mu baana bawe bbaa.

Busuma bukwi̱ti̱si̱yagha
by Bakawelayo Jeremiah
Mumu bhili ghwa bundigele, akaba aliyo musaasa liina liye kibhi kyaabo, musaasa oghu akaba ali nabakali be musanju, babyaye baana ki̱ku̱mi̱.
kibhikyabo oghu akaba asaye banakiye mu bu̱gu̱dha. Akaba atu̱ngi̱ye nte, na mbuli si̱kani̱ye, bhaatu kibhikyabo oghu nobu anabagha atungi̱ye atiyo, akaba amanu̱we nangu̱ki̱ ali musuma mumubhili oghu.
kilo kimui mulilanuwa wa kibhikyabo aghenda mumusili ghuwe ghwa kooko, kibhi kyabo akabone mukama wa musili ali̱gi̱ta.
kilo kinji mukama wa musili aghenda kulinda musili ghuwe, akwata butabuwe, eebisa mumusili ghuwe oghu, busela bwedha, akabona akabona kibhi kyabo asi̱ye, kibhi kyabo oni natandika kunogha kooko, mukama wa musili amupiima cini-nini, du̱mbi̱ kibhi kyabo amubona atandika kutangana nanamwesengeleliya ati gu̱tu̱ otandasa onganile akili ndakusasulamu nte syanje syona. Kibhikyabo bamukwata bamutwala eka mu bakama asasula nte na mbuli siye syona atighala atiyo atali na mulonko ghwona ha ka. Du̱mbi̱ bakalibe batandika kwendaniya naye mbaghila bati twakughambilagha tuti oleke busuma wabhenga buye nte syatu esi syona syaghuwaki? Ka ya kibhikyabo yaba butaghwana, akaki̱ngagha na baanabe babbala kumuhuula. Kibhikyabo eighuwa atali na businge mukaye acuwamu kuhuula bakalibe, bakali aba boona baghendakaka ewabo.
Baana boona balalanga baghenda kitiyo kitiyo, kibhikyabo atighala enkaha. Atandika kwibhila kimui kandi abeela kimui muyahi mu mubhili ghwa bundingele, kuni nabagha ali mu̱gu̱dha kumalilila. Atighala atiyo nanga busuma. Bhawai busuma mbubhi, noobu oba oli naki̱ti̱ni̱sa kyengane haa, okuwawanagha nanga busuma.

Badu̱bha obu̱u̱li̱ya
Mubulya wilson

haanu̱ma ya myaka joo kongo emali̱ye kutunga kwelema, mu kyalo kya katuwa e bhutembo bakatunga mi̱ghenu̱ mujungu mu miisonale. Mujungu oghu akaba alu̱ghi̱ye bungeleeja ali na myaka 79 ya bukulu. Mali̱i̱na ghe aaniiye charles rollings.
mbyaluwa sya mukyalo eki syabu̱ghagha lunande/lukonjo. Bamui mu bo bakaba bamani̱ye kiswahi̱li̱ na basomi̱ye bamani̱ye lufulansa. Na rollings aabu̱ghagha lujungu lwonkaha. Bantu abaabbalagha ku̱bu̱gha naye baasaalilagha mwa mwegheesi̱ya wa lujungu mu si̱ni̱ya eghi ekaba eli haai nabo. Mu kisiika hambali aalaalagha akaba alimu na lubbaau na cooka sya kuhandi̱i̱ki̱ya. Bantu abaghendagha kumolola, nuwaamala kumulamu̱ki̱ya akukwati̱ya cooka kuhandiika li̱i̱na lyawe haa lubbaau.
kilo kimui musaasa mukulu mu̱su̱u̱bu̱ji̱ kandi aghonji̱ye di̱i̱ni̱, kyamukaagha lwagholo aghenda kulamu̱ki̱ya mu̱ghenu̱ wabo. Akonkona haa lwighi, mujungu amuughulila ataaha. Balamukani̱ya oli ati, “gu̱du̱mooni̱ngi̱” nooli̱ ati, “habari” byakwongel’o byabula baakala balolaane. Nga ngeso yee, aaha musaasa mukulu ki̱ghendu̱ kiye kibheghe kya cooka. Aakikwata eegota haa lubbaau kuhandiika li̱i̱na liye kulungi mu byapa ati “mbasa”. Obu aamali̱ye, aalyongota aahundamu. Mujungu aasikamu kwighi kuwe aatu̱mana haa bitabo biye. Musaasa oni obu aatooye aaghenda mu kicumbilo aayayo ndyankui kyabhu̱la aasa nayo ewaa mujungu. Aati̱ngita lwighi lwehighula aataaha akwete kyabhu̱la kini. Obu mujunju aamu̱bhelu̱mi̱ye, aahanja ebi aakolagha aamatuka amujwikila na ndyankui yoona aamu̱su̱ku̱ma enja. Musaasa mukulu oni baamu̱twesi̱ya kaahi̱yo-kaahi̱yo, oli naabu̱gha ebi̱ye nooli̱ ebiye bataaku̱u̱ghu̱wana. Mujungu aati̱ngi̱tamu na maani̱ ghoona lwighi gboku̱; na kutaamu buughali̱yo. Aasitama haa bulili, saghama yaamuumilila, esoke lyatandika ku̱mu̱bi̱na haa mutuwe, eni kitima nki̱neehesi̱ya kiti, “ku̱dhu̱-ku̱dhu̱, ku̱dhu̱, ku̱dhu̱—. Musaasa waawe mbasa naye eni hanja ghutamulimu. Ati, “bhaawai̱ naahemu̱ki̱ye mu̱ghenu̱ waatu aku̱u̱su̱ki̱lani̱yamu a kaa lumumba.” aghile ati , ‘naabaagha ni̱i̱si̱ye kumwati̱ya na ndyankui kuni bbaa!’ ”
du̱mbi̱ aaghenda ewaa mwegheesi̱ya oghu akuhindulagha ebyabo na mujungu. Sikaba sili haai nga saaha eku̱mi̱ sya lwagholo. Aaki̱dha weena ahooyemu. Aasanga mwegheesi̱ya ali haa kiikopo kya caai naakebela bitabo bya baana. Mwegheesi̱ya eekanga kubona musaasa muntu mukulu naaheeselukana nga muntu aali̱gi̱ti̱ye haa bulemo kedha oghu aleeti̱ye makulu ghaakusaba mwongelo. Mwegheesi̱ya aamughila ati, “tulimu” musaasa mukulu oghu aakuukamu ati, “gutu onjune kijibu kini, si̱ye kitandu̱ghi̱i̱li̱l’o. Mwegheesi̱ya aamuhanga abili. Aamala daki̱i̱ka nga esatu naanahuumulikana nga muntu aku̱komi̱ya kubbala ku̱twii̱kana. Obu aamali̱ye kuhuumulikana, aamuuhilamu liyo lyona. Aaghila ati kijibu kyabaaye haagati yabo bombi kutaba na lu̱bu̱ghe lwa kubalungani̱ya. Aamughambila ati kughendeleluwa kiye kyabaagha kumughambila makulu ghaa li̱ina liye mbasa elikumani̱i̱si̱ya ndyankui mu lukonjo. Ati niikiyo kyaleki̱ye endela ndyankui mu kicumbilo. Aasaba mwegheesi̱ya kughenda e waa mujungu amwesengeleli̱ye atabi̱holi̱ya nanga mujungju aghenda kubbala bulaalo kedha kulanga mu baa bu̱sobœli̱. Mwegheesi̱ya eehuulayo kaakopo ke kaa caai aati̱gha binji byona. Musaasa mukulu anabi̱li̱ndi̱ye. Musaasa mukulu oghu aamughila ati, “gutu okole byona ebi okusobola tankududukana otakaku̱u̱ki̱ye.”
mwegheesi̱ya aaghenda nanguwa nga muntu oghu akughenda ku̱ni̱i̱na bbaasi eghi eli haai kusimbula. Aaghenda, aaki̱dha aakonkona haa lwighi, aategheeleli̱ya ataaghu̱wa na nkabaalala ya muntu. Aakal’o haala kumala daki̱i̱ka nga etaano, aatodha aakonkona. Mujungu aamuka haa bulili ghutamulimu neeli̱li̱kana ati siti mbasa endeeye bantu baakukwati̱i̱sani̱ya nabo kumumal’o. Aadu̱bha aalolola mu kahulu kaa lwighi. Obu aaboone mulungani̱ya wabo oni, du̱mbi̱ aaghula lwighi bwangu-bwangu. Aabu̱gha naye mu biiweewe ati, “weekambe otaahe ekati bwangu nanga tuli ha buukenke.” eli haa mutima ati ki̱i̱se tanku̱ku̱wa nenkaha bbaa. Aatodha aataamu lwighi luwe beehighala fui. Dhaani boona baalolana. Obu haa mutima ghwa mjungu eli ng’oghu oti baamutaayo piki-piki esi̱ku̱tu̱tu̱ma. Mujungu aahuumula ng’oghu aku̱lu̱gha kukununuka mwena ati, “ohuu…!’ aatandika kumughambila byona ebyamubaay’o. Na mwegheesi̱ya naye aamughambila ekyamu̱leeti̱ye. Mujungu aakeekela kijungu ati, “ha,haa!” andi̱ngi̱ya mutuwe. Aamuka aaghuwa mwegheesi̱ya mu ki̱ku̱bha ati, “mukama asi̱i̱mu̱we” na mwegheesi̱ya ati, “amiina.” boona baateli̱ya hansi baatandika kusaba bu̱li̱ omui mu lwewe. Kumanya mujungu maku̱ni̱ ghamwi̱ti̱ye, aasabagha naaku̱mi̱ya bighambo mbinatwi̱ka-twi̱ka.
mwegheesi̱ya aakuukayo ewe, muunakiye aamuuhilamu kighele. Taaseli̱ye nangoku bwabaagha mbughenda kwita maaso. Mwegheesi̱ya akasanga musaasa mukulu analoleleeye elembo. Aamughila ati, “waamusangi̱y’o? Oli̱ aasi̱i̱ma. Aamughila ati, “onkobhe nagho. Aamughambila byona ebyabaay’o du̱mbi̱ musaasa aamanya kukuukayo ewe. Nkyambisi, mbasa aabighambila abaasi̱ye mu kani̱sa kusaba. Aaghila ati, “luhanga ali na bu̱toki̱ kandi akuhaagha bisembo kaati̱-kaati̱. Tooli̱ badu̱bha obu̱u̱li̱ya.”

Bu̱ku̱u̱bbi̱ ni kujaabhuwa
Si̱ye maaha akanti̱gha ndi na myaka enaa ya bukulu. Nankabha tita naabaagha na bakali̱ banji. Taaliyo n’omui oghu akaneekundila nga mwana wee. Bwile bunamu̱nji̱ tita taakalagha e ka. Akaba ali na mulimo mu gavumente. Akaba ali w’omuluka kandi aakilagha kwisa e ka haanu̱ma ya sabbi̱i̱te ebili. Tita kutaakala e ka kikambeela kijibu. Obu twabaagha ntuliya baakala kundola ki̱i̱so-ki̱i̱so. Byokuliya mbyahuwa handiilo, si̱ye batatodha kumpa kaa nkolo munagha.
nga bu̱li̱ kilo nku̱u̱bbi̱ sikulwalagha njunja. Nkaba na mu̱gi̱sa syangu̱tu̱wakaki̱ye bighele na kunjiyamu bi̱ku̱lu̱. Tita naabu̱u̱li̱ya ekikulekagha batasinjiya bampabi̱i̱li̱li̱ya bati nkusibhengelagha. Tita naaghu̱wa eki, ampuulanga atambu̱u̱i̱ye. Bhaawai̱ bu̱ku̱u̱bbi̱ ni ndwala. Nku̱u̱bbi̱ teeli̱ya, egbu̱u̱ma. Nku̱u̱bbi̱ eekala kuliya mbanaghi̱mi̱ghangila biyo mu ngalo; baakala kughinokomeelela.
kilo kimui mukaa tita mugholi aghila ati akunjiya njunja. Eghi aakanjiyagha anconconamu kaahi̱yo. Ankamilamu biijai̱ abi̱lu̱ngani̱i̱yemu kaamulali. Mukilo ndaala ntaghwesaghiiye, ninkakamiililuwa kandi nindila.
ekyalu̱ghi̱yemu, naaghenda hambali maaha aabaagha asweuwe. Mu bilo bikee njunja syankila. Nkalu̱ghayo kwisa kutandika kusoma ninaahi̱ki̱ye wa kusyehiya neenini.
bakali̱ na basaasa muukalaghe mu bumui. Ku̱gu̱mi̱si̱li̱ja na kwesighangana niibiyo bikulekagha buswele buhangaala.

Ngughuma sikusasulagha
mwesige Robbin

Hakaba aliyo basaasa babili, omui aaniiye bu̱dhooti̱bwabo na onji aaniiye bukalali̱ya. Bombi bakaba bali bateghi̱.
bukalali̱ya na bu̱dhooti̱bwabo baaghenda mu kisaka kutegha. Haanu̱ma ya bilo bibili, bu̱dhooti̱bwabo aaghenda kwanja ki̱ki̱ya kiye. Mu ki̱ki̱ya aasangamu nkubha ekwatu̱u̱wemu. Nkubha yaamughila eti, “bu̱dhooti̱bwabo, onsumuulule nanje ndikuyamba kilo kinji.” bu̱dhooti̱bwabo aaghisumuulula.
bukalali̱ya naye aaghenda kwanja ki̱ki̱ya kiye, naye aasanga nkubha ekwatu̱u̱wemu. Yaamughila eti aghisumuulule nayo elimuyamba kilo kinji. Bhaatu bukalali̱ya aaghikuukamu ati, “okilole kiyo ngoku ki̱tu̱ku̱li̱laniiye.” eehogbuwa aaghenda aaghi̱ti̱gha yaagundilamu.
bukalali̱ya aaghenda haa ki̱ki̱ya kiye kinji aasangamu njoka ekwatu̱u̱we. Njoka yaamughila eti, “tonsumuulula wai̱, naje ndiisa kukuyamba kilo kinji.” bukalali̱ya aaghighila ati, “maa ee, okilole kiyo kini ngoku ki̱bbu̱du̱ngu̱ki̱ye bi̱i̱so kyatodha kyajambukana nga mulabha, okubona, ekibagagaali̱ya.” bukalali̱ya eehingiya, eeghendela. Na bu̱dhooti̱bwabo naye aaghenda kulola ki̱ki̱ya kiye aasanga njoka ekwatu̱u̱wemu. Yaamughila eti, “wai̱ kabhootu̱ onsumuulule nanje ndikuyamba lunji.” bu̱dhooti̱bwabo aaghisumuulula du̱mbi̱ aaghenda ewe.
bu̱dhooti̱bwabo na bukalali̱ya baaghila bati baahi̱ki̱ye kuswela. Bu̱dhooti̱bwabo aaghenda mu beesekulu be kubbala mukali̱ wa kuswela. Obu aaki̱dhi̱ye aabaghambila ekyamu̱leeti̱ye. Baamutwala e waa musaasa oghu ali na baana boobukali̱. Baamuha ndyankui kughenda kwati̱ya ki̱ku̱mbi̱. Baamutwala baamwoleka kibaale kighendelaana bati, waati̱ye lukui ndwolu.” aalola eku̱wa na elughulu. Aahi̱dha ndyankui kukinga kwati̱ya ebaale. Du̱mbi̱ ki̱i̱luu̱bbu̱ kyakwata, nkubha yeetanu̱ka kibaale kini kyacencebhuka bihande-hande. Baakuuka e ka baahi̱ka baabu̱u̱li̱ya baana abaabaagha nabo bati, “ki̱ku̱mbi̱ aakyati̱i̱ye?” baaghila bati, “ee, aakyati̱i̱ye kyona-kyona.” baaghila bati mumuhe kipanga aghende mu musili aateme. Baamuha kipanga baamutwala kumwoleka haa kukola. Obu baaki̱dhi̱ye, baamwoleka, aasanga hambali baamwoleki̱ye mabhi̱ ghamalakaki̱y’o hoona-hoona na bukondelo butali. Aabu̱u̱li̱ya ati, “kini niikiyo kisaka kya kutema?” baamughila bati, “ee niikiyo eki.” aakwata kipanga aagomba kutandika kutema. Du̱mbi̱ aabona njoka ehooyeyo yandalila haa mabhi̱ du̱mbi̱ ghoona luhande lumui ghatandika kukota mu ki̱i̱na. Aasinjil’o kati̱i̱, baana baamughila bati, “tukuuke e ka saaha syatu̱ti̱ghi̱ye.” baaghenda baakuuka e ka. A b’eka baabu̱u̱li̱ya alakaba naakoli̱ye mulimo. Baana baamuheela buukai̱so bati aaghu̱koli̱ye ghwona kusemeeye. Baana bani baamughambila bati, “mbaakughambiiye kukoma ehu̱si̱ko, okomemu elili na mwali na kahumbu.” obu baaki̱dhi̱ye ab’eka baamughila bati, “oghende weekomele ehu̱si̱ko limui elyetwalile, nuwaahi̱ki̱ye mu kihanda olisambuule. Niikuwo aaghendi̱ye aakoma ehu̱si̱ko elikaakuuye. Mahika mu kihanda alisambuula aalu̱ghamu mukali̱ atasemela atiyo, aaghenda aamu̱ki̱dhi̱ya e ka e waabo.
kilo ekyalabhi̱y’o bukalali̱ya naye aaghenda mu beesekulu kubbala mukali̱ wa kuswela. Baamutwala hambali akutungila mukali̱ wa kuswela. Naye baamuha ndyankui baamuha baana kughenda kumwoleka lukui lwa kwati̱ya. Obu baamutwete baamwoleka kibaale kighendelaane, baamughila bati, “lukui ndwolu.” aanakuukamu ati, “enu̱we mulwaye! Niha hambali bakwotagha mabaale?” aakwata ndyankui aaghikonda haa ebaale yoona yakongoleka, aatodha aaghi̱kondi̱y’o, yeeku̱na-ku̱na mu maano. Baakuuka e ka, baabu̱u̱li̱ya alakaba naati̱i̱ye lukui olu. Baana bati, “bbaa, na ndyankui yoona yaatwi̱ki̱i̱y’o.” baaghila bati mumuhe kipanga aaghende ateme kisaka. Aaghila ati hakili kutema kusaai̱ye kwati̱ya bibaale.” baaghenda baamwoleka haa kutema, hoona-hoona ghakaba ghali mabhi̱
Ghasa-ghasa. Aabaghila ati eye taabbali̱ye kwemalaka-ki̱ya bi̱bhi̱ kwenu̱nki̱ya. Baakuuka e ka. Baababu̱u̱li̱ya mulimo ghulakaba nighwakoleeu̱we. Baana baaghila bati, “na kati.”
baaghila bukalali̱ya bati mu mahu̱si̱ko eekomelemu limui alalisambulile mu kihanda. Eekomela ehu̱si̱ko elikubbebbeniya kandi elitelelu̱ki̱ye. Obu aahi̱ki̱ye mu kihanda aalisambuula, akabona kibhughuma kya ntale nki̱hu̱ghu̱kamu. Bukalali̱ya obu aaboone eki aaki̱ndu̱kila ndigito, aali̱gita ntale yaati̱ghala esweki̱ye. Bukalali̱ya aakuuka atali na mukali̱.

Njala ekulehi̱yagha bintu
Sunday K. Ezra

akaba aliyo musaasa li̱i̱na aniiye kyetunda. Akaba ali na mukali̱ wee omui na baana be basatu.
njala yaaghuwa mu kyalo kyona. Muntu noobu abaagha na sente haa kughulila byokuliya hakaba atali. Kilo kimui kyetunda waawe akwata buta buwe na muholo ghuwe kughenda kubbalila baana be na mukali̱ wee byokuliya.
obu aaghendi̱ye, aabona kikonje kingaalu̱wa kihangiiye. Naaneebinga kikonje eki nakiyo kyakala nki̱neesu̱kana. Aakikwama, aakikwama eetu̱lakaka aki̱dhi̱ye haa ka. Haakpengbu̱ bikonje bikaba bitukulilani̱i̱ye mu musili. Ki̱i̱se ka eni ekaba eli ya ki̱i̱si̱i̱li̱mu̱. Ki̱i̱si̱i̱li̱mu aamwebali̱ya ati, “kau mu̱ghenu̱” naye aakuukamu kindi busaasa ati, “nkusangi̱ye” ki̱i̱si̱i̱li̱mu̱ aymuha ntebe aasitma baalamukani̱ya. Baaghahaana, baaghaana. Ki̱i̱si̱i̱li̱mu̱ waawe aaghila ati baamali̱ye kuba bana bu̱u̱bhootu̱. Aamughila ati aghende aleete mukali̱ wee na baana be baleke kuukala mu njala. Kyetunda aakuuka e we na luko lumui lwa kikonje kihangiiye. Obu aabaagha naanaghenda aasangaana mbuuku mu kihanda aaghilasa yaaku̱wa aati̱gha aghi̱bi̱si̱ye. Aaghenda aaki̱dha aaghambile abe bya bu̱u̱bhootu̱ bwabo na ku̱ku̱lu̱ka kwabo. Baaheekelana byabo byona baaghenda. Obu baahi̱ki̱ye mu kihanda kyetunda aayayo mu̱ku̱ ghwa mbuuku baaghu̱si̱ka baaghenda baaki̱dha e waa bhootu̱ syabo.
bwile obu bwakeeye, ki̱i̱si̱i̱li̱mu̱ aaghila bhootu̱ wee ati eye alimaghenda kwebungabu̱ngi̱ya. Tooli̱ ahaaghe mugimba ghumui ghwa kikonje ateeke na mwana wee omui niighuwo ghukuba mukubi ghwa ki̱i̱si̱i̱li̱mu̱. Musaasa aasi̱i̱ma, aahaagha kikonje aateeka kibelo kimui kya mbuuku. Aani̱i̱ni̱ya mwana wee omui mu kiti ekyabaagha haagati ya ka ya ki̱i̱si̱i̱li̱mu̱ hambali aasitamagha mu nti̱na ya kiti eki. Ki̱i̱si̱i̱li̱mu̱ waawe aakuuka aaliya, eegbeeku̱wa ati, “heei̱yaa, ebyanje byeleeta.” bwala baalaala bwakiya. Nkyambisi aatodha aaghenda kwebungabu̱ngi̱ya aamughila ati, atodhe aate mwana onji ateeke mugimba ghwa kikonje. Musaasa aatodha aakola magheji nga ghali̱. Baana boona aabani̱i̱ni̱ya mu kiti baati̱ghala na mukali̱ wee. Ki̱i̱si̱i̱mu̱ aamughila ati aate mukali̱ wee. Aateeka mwanya ghwa kumaliilila ghwa mbuuku, aani̱i̱ni̱ya mukali̱ wee dhee. Boona obu baahooye, ki̱i̱si̱i̱li̱mu̱ aaghila bhootu̱ siye ati, “oteeke mugimba ghwa kikonje si̱ye nkwisa na mukubi ku̱lu̱gha mu lughendo. Musaasa aateeka mugimba ghwa kikonje naye aani̱i̱na mu kiti. Obu ki̱i̱si̱i̱li̱mu aaku̱u̱ki̱ye, aahi̱ka aataaha mu numba yee aatwesi̱ya mati̱mu̱ ghe mukaagha aaghasimba mu mi̱li̱ ya kiti hambali kyetuna n’abe bani̱i̱ni̱ye. Ki̱i̱si̱i̱li̱mu̱ aasitama haa ntebe aaghila ati, “ebyanje byeleeta; kyetunda obwalo niiyo bukenga.” anali haala mwana wa bukulu wa kyetunda kongo yaamukwata, aaghila ati akuniya, baamu̱hi̱nda aabhenga. Aaniya mabhi̱ gheegbadhikila ki̱i̱si̱i̱li̱mu haa mutuwe eghulu na haa mabegha. Ki̱i̱si̱i̱li̱mu̱ eeku̱m’o aanu̱nka aaghila ati, “ghani ni mabhi̱ ghaa muntu.” obu aaloli̱ye eghulu aabona kyetunda, mukali̱ wee na baana be. Aaghila kyetunda ati, “nanje mu̱u̱ni̱i̱ni̱ye nkubooleka esamba lyanje na kibanja kyanje hambali biheleeye. Baaki̱su̱ndu̱ki̱li̱ya mughuwo oghu baani̱i̱ni̱lagh’o. Aatandika ku̱ni̱i̱na. Obu aabaagha ali haai kubahi̱k’o aalengemeeleluwa baalekela mughuwo ki̱i̱si̱i̱li̱mu̱ aataasukayo aahi̱ka eetunga haa mati̱mu̱ aataka kpiyo, aaku̱wa. Kyetunda n’abe baasu̱ndu̱ka baatunga musili ghwa busa. Nandi kyetunda ati, “ebyanje byeleeta”

Bugheji takuli kuneeta
Baguma godfrey

Obu kyanda kyahingulaane, bihamba na maasi ghoona ghooma mukyalo. Binyama byona bya mu kisaka byagumbaana niikuwo byelimile ki̱i̱na bikole nsulo. Binyama byona biinamu̱li̱to na biinabwana byasa.
byadu̱bha kwekomela mukama. Kaluulu kaakwata wanjoghu̱ kuba mukama wabiyo nanga niiye abisaaye kuneeta. Byahikilani̱ja kilo kyakutandika kulima kwetungila maasi. Byalima, byatunga maasi ghaabiyo. Bisolo byona byakola mulimo kyonkaha Wakame aabhenga kwelungani̱ya nabo. Byatu̱wamu kut’o mu̱li̱ndi̱. Byakoma wantale kuba mu̱li̱ndi̱ wa maasi.
Wakame waawe aaghenda aakwata ki̱su̱si̱, anjunga-jungilamu bisaabo na musene. Obu aamali̱ye du̱mbi̱ aaku̱ndi̱ki̱la, aaghenda kulola maasi aghabaaghomooye. Naaneebinga maasi wantale aamubona anali hambali eebi̱si̱ye. Wantale aamughila ati, Wakame akuukile haala, okabhenga ku̱tu̱li̱mi̱i̱si̱ya maasi.” Wakame aamughila ati, “si̱ye tankunuwagha maasi ghaanu agha bbaa, bukuwe bwanje bakundeetelagha ghanje aghalimu ki̱li̱i̱si̱ya.” aaghila wantale ati aase anuuw’o niikuwo aaghu̱we bu̱nu̱li̱ bwagh’o. Wantale aalu̱gha hambali aabaagha eebi̱si̱i̱ye aasa.
Wakame aamughila ati, “ntakakuhaaye kunuw’o odu̱bhe oghende ojombe bighoye byomiiye myeteete, mali̱gi̱ na bu̱u̱ku̱u̱se obileete. Wantale aaghenda aabijomba, aabileeta. Obu aabi̱leeti̱ye, Wakame aamulaghila kubitalamu ki̱ti̱bo. Aabitala du̱mbi̱ aamughila ati, asi̱i̱me adu̱bhe amubohe niikuwo amuuhe anuwe haa maasi ghaa bukuwe buwe. Wakame aaboha wantale.
obu aamali̱ye kumuboha atali na bwesumbulilo, aatandika kumuhuula na bi̱ghu̱mo-ghu̱mo bya ki̱tu̱lu̱. Wakame aatu̱ngu̱dha bisaabo bini aatahilamu maasi ghagenenu̱ki̱ye aacu̱ku̱mu̱la, aanaabi̱yamu kulungi. Aadu̱bha aanuwa, aakota mu maasi aanaaba aatodha aaghaniyamu. Aaghenda, aati̱gha wantale anaboheeuwe. Obu binyama binji bwasi̱ye, kutaha maasi wantale aabighila ati bimusambuule. Aabisoboolola byona ebyamubaay’o. Bisolo byatuwamu kut’o kongo kuba mu̱li̱ndi̱ wa maasi. Kongo aasi̱i̱ma aaghenda eebi̱sa mu ngu̱gu̱ kulinda Wakame. Wakame waawe obu aasi̱ye aalolakaka ataabona na kantu. Aakota mu maasi kutandika kunuwa na kutaha. Du̱mbi̱ kongo aalu̱gha mu ngu̱gu̱ aasa aaluma Wakame haa kilimi. Wakame aahu̱ghu̱ka mu maasi aahanja ki̱su̱si̱ kiye kyasenda. Wakame aasaaghuwa ku̱bu̱gha. Wakame aatokani̱ya kwehiya kongo byaba bilajo. Wakame aaghenda e wee kongo anamukpatidhilaane haa kilimi. Obu baahi̱ki̱ye e ka mukaa Wakame eesengeleli̱ye kongo kulekela ebawee. Kongo aamutaasuk’o du̱mbi̱ aaghenda mu munagha ghwabo aanuwa maasi ghoona na ghanji aaghahanja kitiyo-kitiyo. Munagha ghumali̱ye kwoma, mbu̱la yaakwati̱ya yaatandika kutoona. Bu̱li̱ kintu kyatunga maasi ghaabusa.

Lugheji-gheji lu̱kwi̱ti̱i̱si̱yagha
Mubulya wilson
Wakaamambo aakelelagha mu mu̱mi̱li̱ ya ki̱tu̱lu̱ kuliya buhuka. Kaamabo waawe akaba ali mu mi̱li̱ ya kiti na bi̱i̱bbi̱mbo bili eghulu mu matai kuliya bi̱ghuma.
kilo kimui ki̱i̱bbi̱mbo kyasu̱ndu̱ka hansi kukwamilila bu̱ghu̱ma obwalaghalikagha. Obu kyaloli̱ya cininininii… kyabona wa kaamabo. Wakaamambo naye aabona kiibimbo. Byatandika ku̱bu̱u̱lani̱ya bighendeleluwa . Haala aalu̱ghamu bu̱u̱bhootu̱. Obu byabaagha binali aala bikabona nkala neehi̱ya kandi na mwegha nguhungila kimui. Ki̱i̱bbi̱mbo kiti njala yaamali̱ye kughuwa ki̱tu̱lu̱ kikuhiya na bi̱ghu̱ma bihuw’o” na kaamambo ati, “buhuka bwona na mahuli ghaabuwo byona bikusiilila.” byona hamui biti, “kini nkiki!”
Ki̱i̱bbi̱mbo ekyabaagha kili mukiti eghulu kyabilikila kinakyakiyo kiti, “wai̱ wiise tughende tasanguwe nitwetungila hanji bwile butakaali̱ye. Kaamambo aasobeluwa eesengeleli̱ya bhootu̱ wee kutamu̱ti̱gha. Ki̱i̱bbi̱mbo kiti, “uwe akusobola kuhalala otali na mapapa? Kaamambo aakuukamu ati, “obilikile muunakyawe naaye aase asu̱ndu̱ke hansi. Tu̱ku̱koleesi̱ya kati kani. Uwe okalume hani nooli̱ hali nanje nkalume haagati. Du̱mbi̱ muhalale nanje.” ki̱i̱bbi̱mbo kyabona magheji ghalimu. Kyabilikila munnakyakiyo baakolakuwo. Bi̱i̱bbi̱mbo byahalala na kaamambo kanalu̱mi̱ye kati haagati.
obu baabaagha mbanaghenda mbaamali̱ye ku̱ti̱gha nkala neenahiya enu̱ma, kaamambo waawe aatunga kyeli̱li̱kano. Aaghila ati, akubbala kughambila bi̱i̱bbi̱mbo kyeli̱li̱kano kiye. Obu eesami̱ye ku̱bu̱gha aataasuka haa kati aka aabaagha alu̱mi̱ye. Aasa naalu̱ma aahi̱ka eesekula haa ebaale. Aatikaa-tika ki̱ku̱ku̱. Aakala ku̱hu̱u̱teela. Bi̱i̱bbi̱mbo byaghenda. Kaamambo eesanga ati̱ghaaye enkaha mu elungu.
obu aabaagha anali haala abu̱lu̱u̱we kyakukola, aabona kitinda. Aaghila kitinda kati, “gutu, onkumaani̱li̱ye bi̱ku̱ku̱ byanje obinte haa mughongo. Obisaalile hambali byabheghangu̱ki̱ye. Bikwataane, tooli̱ uwe mu buhuka bwona si̱ye na lubyalo lwanje lwona tatulikuliya bbaa.” kitinda aaghu̱wa aki̱li̱ye lu̱ku̱, aakolakuwo. Bi̱ku̱ku̱ bya kaamambo byakwatana.
ku̱lu̱gha bwile obu niikiyo kyaleki̱ye kaamabo kaaba na bikpanga-kpanga haa mubili ghwak’o.

Bu̱u̱bhootu̱ bwa bu̱ghobi̱ya
Mubulya wilson
Kigbende na njoka bakaba bali bana bu̱u̱bhootu̱. Boona baakilagha kusanga-sangaana mu kihanda.
kilo kimui beeli̱li̱kana ku̱ki̱dhi̱lana mu maka niikuwo ab’omu maka ghaabo babamanye baleke kubaaghwi̱la mu bisuula kwonkaha.
wanjoka oghu aaleeta kyeli̱li̱kano, aaghila bhootu̱ wee ati adhu̱bhe aase amulole. Kigbende aasi̱i̱ma. Kilo eki baalaghaane kyahi̱ka. Kigbende, mukali̱ wee, na baana be babili, baamu̱ki̱ya kughenda kulola bhootu̱ wabo. Obu baaki̱dhi̱ye, baabeebali̱ya kulungi nkwoku. Baabata mu numba haa di̱i̱lo. Wanjoka obu aaghendi̱ye kulola ebi mukali̱ ateekeeye baa bhootu̱ baabo aabona ati ebo bakufweluwa kaakuba babiha baghenu̱ kubiliya bonkaha. Du̱mbi̱ wanjoka aaghila mukali̱ wee ati, “etu̱we boona tukuliila hamui, si̱ye ni̱mani̱ye kyakukola. Baasembeja byokuliya. Aaghila mukali̱ wee ku̱ti̱gha maasi ghaa kunaaba mungalo hanja. Aaghila boona hamui na baghenu̱ ati baghende banaabila hanja du̱mbi̱ baase baliye. Ki̱gbende naabe boona baaghenda mbahalalani̱ya kunaaba mu ngalo. Obu baaku̱u̱ki̱ye wanjoka aabaghila ati, “mutodhe mughende munaabe nanga musene ghubaasu̱u̱ye mu byala. Baatodha baaghenda niikiyo kimui. Haakumaliilila baasa baasanga wanjoka na baana be mbaamali̱ye biliyo. Wanjoka ati, “taghuli musango ghwanje, nanga twobahi̱ye ku̱tu̱neneeleli̱ya byokuliya. Kigbende naabe baakuuka e waabo batameli̱ye na kabheghe.
obu baatodhi̱ye kusangaana mu ki̱i̱kalo kyabo kya bu̱li̱ kilo. Kigbende aaghila bhootu̱ siye ati, “ebyasaaye tutabita haa mutima. Gutu wiise otubungile naawe omanye ewanje. Wanjoka aasi̱i̱ma ataasu̱ki̱ye eki aakoli̱ye muunakiye. Kilo baalaghaane kyahi̱ka, wanjoka naabe baaghenda ewaa kigbende. Mukaa kigbende ati eye taakubateekela nanga bakabakola kubhi ewaabo. Kigbende ati, “eki otakifuw’o nanga magheji taghaba ghomui. Mukaa kigbende aateekani̱ja kulungi. Baadi̱ni̱ya ntebe syeli̱ghi̱i̱li̱li̱ya meeja eghi eliyo byokuliya. Du̱mbi̱ kigbende aaghila baghenu̱ bee ati, “mwise tutandike kuliya, ati kyonkaha bu̱li̱ omui abhonganuuwe kusitama mu ntebe.” wanjoka naabe baatalibana kusitama mu ntebe baasaaghuwa. Obu kigbende naabe aniibuwo baneeku̱ma biliyo. Wanjoka naabe baasaaghuwa, aasaaliluwa aaghila ati akubbala kukonda na kumela kigbende. Nandi kigbende ati, “njuke okinge! Du̱mbi̱ kigbende aatandikil’o ku̱bhi̱mba na kufuuha. Du̱mbi̱ mukaa kigbende aaghila tongaasiye mukaa wanjoka mu ati, “ekinkukolagh’o banji siye tambali̱ye bakinkol’o.” mukaa wanjoka aaghila ebawee ati bakuuke ewaabo baghende beebbalile kaakuliya batatwikana.

Bu̱si̱ghu̱wa bwa maaja-maaja
Mubulya A. wilson
Musaasa akaba ali na mukali̱ wee oghu ataadheedhuwagha na eba wee. Bu̱li̱ kilo mukali̱ aakalagha naatongani̱ya eba wee oghu. Mukali̱ naabona bakali̱ baanakiye mbateeka mukubi oghu eye atali naghuwo du̱mbi̱ abhenga kuteekela eba wee.
obu musaasa aaboone butaaghu̱wana busuuye muka yabo, aaghenda eebu̱u̱li̱y’o baanakiye. Baamughila bati eeyegheesi̱ye kutegha.
nkyambisi aakeelela aakwata eti̱mu̱, buta na mu̱su̱ko ghuwe, eegheleka kidimo kya nsu̱ka. Mukali̱ wee aamubona ataamufuw’o ku̱mu̱bu̱u̱li̱ya. Haa mutima ghuwe ati, “okakyeha!” musaasa aaghenda mu ki̱bhi̱li̱ aabona mwaso ghu̱telelu̱ki̱ye bbulu-bbulu. Aasu̱ndi̱li̱y’o biita biye aatandika kulima buhiya. Aabulima na maani̱ ghoona. Aabumala, aabu̱swi̱ki̱la, aakwata byoghi biye aatandika kukuuka e we. Mu̱gi̱sa ghuwe ghulungi atakaki̱dhi̱ye ewe aakoma namikila mu kihanda. Obu aaki̱dhi̱ye na ehu̱si̱ko, mukali̱ wee aasa kumutangilila h’elembo. Aamughuwa mu ki̱ku̱bha, aamujuna ehu̱si̱ko. Kilo eki baaghwesaghila mbeba etaakubaghuluka.
obu bwakeeye mukali̱ wee aamu̱bu̱u̱li̱ya hambali eso eesaaye. Musaasa aamukuukamu ati, “kaagona takaleeta ehu̱si̱ko.” du̱mbi̱ musaasa aamukilamu kukuuka hambali aalaaye ali̱mi̱ye buhiya buwe. Obu aaki̱dhi̱yeyo aasanga bwehuuyeyo. Aaghenda adheedheu̱we. Obu aalangi̱li̱li̱i̱yemu aadingbila, aasanga ntu̱u̱li̱ ya nguwe esukumaanemu. Nguwe yaamughila eti, “oleke kwobaha, gutu onjiye mu buhiya nkukuha mi̱gi̱sa ya kwitagha bunyama bwona bwa mu ki̱bhi̱li̱ muni.
musaasa waawe mutima ghutamulimu, aaghenda aajomba bighoye byomiiye nga myeteete na mali̱gi̱, aasa haa mutima ghuwe ati, “baaghu̱wa akaa mutuwe, kibe-kibe.” musaasa aaguma masaasa. Aakoti̱ya bighoye mu buhiya nguwe yaakoti̱ya ki̱ku̱bha kyayo mu ki̱ni̱gho. Musaasa aatandika kubhula. Nguwe yaalu̱gha mu buhiya. Obu yaalu̱ghi̱yemu yaamughila eti, “waakoli̱ye kulungi kunjiyamu, nguli otaakoli̱ye eki ebyawe byali bihooye.” yaamughila eti niiyo nkama ya nkama ya ki̱bhi̱li̱ eki kyona. Kandi mwaso ghuni ni luguudhe lwayo lukulu. Yaamughila eti eeyongele na maaya bhaatu obu alaatagha kasolo koona akaayaghemu mutima aghu̱ti̱ghaghe haakpengbu̱ nanga niikiyo kilaghilo kyayo. Banabu̱u̱bbhootu̱ bani baalaghangana. Musaasa aaghenda aaki̱dha ataaghambila mukali̱ wee. Nkyambisi aatodha aaghenda kulima mahiya mu ki̱bhi̱li̱ eki.
obu aaghendagha kwanja mahiya ghee, naasanga kantu keehu̱u̱yemu, akola ngoku bhootu̱ siye aamu̱ghi̱li̱ye. Mukali wee naamu̱bu̱u̱li̱ya hambali mutima ghuli, amukuukamu ati, “bunyama bwa mu kisaka tabughila mutima.”
kilo kimui mukali̱ wee aakeela aatuwa niikuwo aghenda aamanya majima ghoonini. Eebi̱sa aabona eba wee naasa, aaghenda amukweme bukee-buke naaneeli̱li̱kana ati, “nkukulenguula obwalo.” obu masaasa aahendi̱ye koona ebili, aabuliilila mukali̱ wee. Mukali̱ wee aatandika kukpeeta ki̱bhi̱li̱ kitiyo-kitiyo manjai̱te. Eetu̱lu̱kaka eehuuye mu buhiya butobheeye. Aasaaghuwa kubwehiyamu. Aakpungbaana, aaholi̱ya aatandika kusaba haa mutima ghuwe ati, “maabileei̱le onganile ondeetele bali̱ye ntalaala muni, obuuni mbu̱la ekwati̱i̱ye. Ki̱tu̱ twabu̱ghi̱ye syaleeta ebawee. Obu musaasa aalangi̱li̱i̱ye mu buhiya, aabona muntu asu̱si̱ye w’omuwe aatandika kutukumila ati kedha aasangaane mu̱li̱mu̱. Naaneebigha-bigha kukuukayo, mukali̱ wee aamughila ati, “ka mutiima, ni̱i̱si̱ye, gutu onjiye mu buhiya naali nkukweme tankutodha.” musaasa aalokaka aagomba mu buhiya naanayamu mukali̱ wee du̱mbi̱ nguwe yaaki̱dha. Yaaghila musaasa eti, “nkimani̱ye ndaghaano yaatu onaghimani̱ye.” musaasa waawe mahililo ghaamughwila, saghama yaamuumulila mu mubili, mukali̱ aabbala kahulu kaa mu̱sondokoli̱ kaabula. Musaasa aaghila aamutima ghuwe ati, “musaasa aku̱wa masaasa.” aamala daki̱i̱ka nga eku̱mi̱ naanaloleesani̱ya mukali̱ wee na nguwe. Du̱mbi̱ na bukali bwa kisaasa aahanga maaso ghee nguwe. Aataka ati, “bu̱u̱bhootu̱ tabulimu nsonombe, gutu nkukusaba ku̱ntegheleeli̱ya ngoku nanje naadu̱bhi̱ye naaku̱tegheeleli̱ya naaku̱u̱ghu̱wa. Oni ni mukanje, tandi n’onji. Gutu nkukusaba wiise otubungilaghe ewaatu. Bu̱li̱ kwisa otwalaghe mbu̱li̱ eghi eku̱dheedhi̱ye ku̱lu̱gha mu mulonko ghwatu.”
nguwe taayaakuukamu kantu yaatu̱mana. Mukali̱ na ebawee baatandika kusaba haa mitima yabo baghwesaghi̱li̱i̱ye. Mukali̱ aasabila haa mutima ati, “ninaaki̱li̱ye buni bali̱i̱ wanje ndamudhootelagha ng’ebeele. Bakaasa kubhali̱ya nguwe etaliyo. Musaasa aaghila mukali̱ wee ati, “jaau̱ tughende nkoto teeswala, ekiikala gbutu bakilasa etasombeeye.
eki niikiyo kikulekagha nguwe siita mbu̱li̱ mu maka.

Bu̱u̱bhootu̱ bwa mutani̱i̱na
Biira mary
Kandi̱byaladhi̱nku̱we na kigbende bakaba bali bana buubhootu̱. Kilo kimui kigbende aaghila bhootu̱ wee ati baghende balole mamba wee baadu̱bhagha kubhasuka maasi.
kilo eki baalaghaane kyahi̱ka baamu̱ki̱ya kughendayo. Obu baahi̱ki̱ye haa maasi, kigbende aaheeka bhootu̱ siye e mighongo baabhasuka. Bamali̱ye kubhasuka, batakaseli̱ye, baabona ki̱ti̱na kya mapeela. Mu ki̱ti̱na eghulu mapeela ghakaba ghatu̱ku̱li̱lani̱i̱ye gheeli̱ye dhu̱. Baaghambilana bati badu̱bhe baliye biitanga bya mapeela. Ngoku kigbende ataakusobola ku̱ni̱i̱na, kandhi̱byaladhi̱nku̱we eehaayeyo ku̱ni̱i̱na. Aabhalaghata kiti kya mapeela. Aatandika kukobha mapeela naanaghaliya ataakulaghali̱li̱ya bhootu̱ wee. Aalu̱gha mu ghuni mutai aaghu̱lu̱kani̱ya mu ghunji nkwoku naanaliya. Kigbende eesengeleli̱ya bhootu̱ wee naye kumulaghaali̱li̱ya akili ki̱i̱bbu̱ne. Aabu̱ghagha naye ng’oghu oti taamu̱u̱ghu̱u̱ye.
kigbende aaghenda aaleeta byalaagha na mulilo. Aalubha byalaagha mu nti̱na ya mapeela aabyaki̱ya byatandika kwaka. Kandibyaladhi̱nku̱we obu aaboone ebi aatandika kutakangana naanaghila ati, “gutu oli̱mi̱ye mulilo oleke nkukobhele biitanga. Kigbende aaghenda aatodha aaleeta ki̱ghu̱mba kinji aakigbadhikamu. Kandibyaladhi̱nku̱we aatandika kulaghali̱ki̱ya mapeela gheeli̱ye na kigbende naanakoma-koma kughaliya. Mulilo ghukaasa ku̱li̱ma kigbende naaku̱ti̱ye.
kandibyaladhi̱nku̱we obu aasu̱ndu̱ki̱ye nsoni̱ syabbalagha kumugenga hansi. Ku̱lu̱gha obu kandibyaladhi̱nku̱we nsoni̱ sikuukalagha simukwete kandi asusaane na bi̱singo byona bya hambali ali.

Ekikulekagha baana nkelembe bataatula bwangu
Mubulya wilson
Hambele baana nkelembe baabu̱ghagha aaniibuwo babyahuwe. Mbaabbala kwonka babu̱gha bati njala ebakwete. Mwana naaluwakaka kuukala alangaaye luhande lumui abu̱gha bamugaali̱ya. Muntu oghu atabbali̱ye ati amulele amubhenga. Bunji-no-bunji baana baabu̱ghagha bintu bitabhonganuuwe. Nga oleke ku̱ndoli̱ya ki̱i̱so ki̱tobhoki̱ye; tambali̱ye kakaakulu kedha kagu̱lu̱si̱ kundela.
kilo kimui mukali̱ akaba alaaye abyaye. Aakeelela kughenda kwebbalila bukui bwa kweteekeli̱ya. Aati̱gha alangaai̱ye mwana haai na ki̱tu̱mi̱ko. Na haakpengbu̱ ya ki̱tu̱mi̱ko nga hali̱, hakaba haliyo mbigha yee elimu kaa maalo ke. Anali hambali aaghendi̱ye kuseena, mukali̱ muliilanuwa wee aasa kwomba mulilo. Aataaha, aabona mwana balaaye babyaye hambali alangaaye. Mukali̱ aasoga mulilo, aata masese haa kisaka. Aaku̱ndu̱kula mbigha yaakpengbu̱ ya mulilo. Aakolamu aayamu mu̱noku̱ ghumui aaghweku̱ma. Aakwata ghunji aaghu̱hu̱si̱ka mu kahu̱ndo eehingiya aatuwa neeli̱li̱kana ati kani kanali kakelembe munu takasobola ku̱bu̱gha.
obu mukali̱ aalu̱ghi̱ye mu nkui aatandika kulabba mukubi ghuwe. Mwana oni du̱mbi̱ aamughila ati, “mukali̱ muuhi-muuhi alamaaye aasi̱ye aasoga mulilo aaghuta haa kisaka, aaku̱ndu̱ku̱la munagha aayamu nyama aaghyeku̱ma, aakwata enji aaghi̱hu̱si̱ka mu kahu̱ndo aatuwa. Obu ni̱na we aaghu̱u̱ye, aamanya oghu mwana akughamba. Aaghenda aamu̱bu̱u̱li̱ya alakaba aaniiye aataahi̱ye mu numba kwomba mulilo. Amani̱ye ati mwana taali n’eki amani̱ye. Aasi̱i̱ma ati niiye aasogi̱ye masese kughenda kwetu̱mi̱ki̱la. Du̱mbi̱ ni̱na mwana oni aaghila ati, “weesaaye notanga-tanga mukubi ghwanje nangaaki?” aamu̱bu̱u̱li̱ya oghu aamughambiiye. Aamughila ati, “mwana oghu aabaagha alangaaye haa kpengbu̱ ya ki̱tu̱mi̱ko.”
obu mukali̱ oni aaghu̱u̱ye eki, nsoni̱ syamukwata, aaholeli̱yo cai. Mukali̱ oni aalengeesani̱ya ni̱na mwana oni aghendi̱ye haa musili. Du̱mbi̱ aaghenda aahaagha binunguwe aabiseka. Aabita mu musekulo aabisekula, aabikama, aabitwalila nkelembe ya mwana eni. Mwana aabinuwa. Obu nina wee aaki̱dhi̱ye, aasanga mwana naasama-sama atali na mu̱bu̱ghe, naatuwa lukondo lwonkaha. Ku̱lu̱gha obu baana baaleka ku̱bu̱gha aniibuwo babyahuwe.

Ekyaleki̱ye bisolo byaleka ku̱bu̱gha
Biira mary
Hakaba aliyo musaasa ali na mukali̱ wee. Bakaba batabyaye kyonkaha bali haa ka basatu. Waakasatu akaba ali mukuwe wee ki̱byala mukali̱ wee. Musaasa oni akaba atu̱ngi̱ye mbuwa emui ya busaasa. Musaasa on taati̱ghagha mbuwa ye eghi hoona-hoona hambali aakaghendagha.
kilo kimui nga bu̱li̱ kilo, aaghenda mu musili na mbuwa yee eghi, musaasa aani̱i̱na eghulu kukasuula lukui olwabaagha lukasi̱ye mu kitai. Anali eghulu, aaleng’o kudhi̱nga-dhi̱ngi̱ya kiti ati niikuwo lukui lutaasukeyo, lwasaghana. Aalola hansi, aalola mbuwa nayo yaamulola. Aaghila ati, “kuba wenkaha nkibhi bhaaba. Kibuwa kini nguli aabaagha muntu nguli tampeeleli̱ya kipanga kyanje naati̱ghi̱ye hansi.” naanaghila ati asu̱ndu̱ke, aaghu̱wa mbuwa yee neemughila eti, “mukama wanje oleke nku̱heeleli̱ye kipanga.”
obu musaasa oghu aaghu̱u̱ye aasweka kumanya asweki̱ye, oobahil’o maililo ghaamughwila aatandika kutukumila nanga bwoba, aamanya ati aasangi̱ye mu̱li̱mu̱. Mbuwa yaamukuukamu neemu̱gu̱mi̱ya eti, “oleke kwobaha. Naatu tuli na magheji nga bantu; kandi ebi mu̱ku̱bu̱ghagha tu̱ku̱bi̱i̱ghu̱wagha byona; kyonkaha tatukubbalagha kubaku̱u̱ki̱li̱ya. Mbuwa yaamu̱heeleli̱ya kipanga, aakonda kitai lukui luwe lwataasuka eghulu. Obu aasu̱ndu̱ki̱ye, kutandika kukondakaka lukui luwe olu, naaneebu̱u̱li̱ya ekyamubonekeeye obwalo. Mbuwa yaatodha yaamughila eti ebi aaghu̱u̱ye atabighambila ab’eka. Yaakala neenamuha makulu eti nankahba bintu byona ebili na bwomi̱i̱li̱ nabiyo ni byabbali̱ye ku̱bu̱gha bi̱ku̱bu̱gha dhee. Bintu nga: noni̱, mbu̱li̱, Wankoko, bihuka na binji ng’ebi. Obu musaasa aaki̱dhi̱ye ewe e ka aaholi̱ya.
kilo kimui, mukali̱ wee aaghenda kuhinga. Eye aati̱ghala na mukuwe wee otabuluuwe mbuwa yee. Mukuwe wee oghu akaba ali na kikoliyo. Banali haala nsoola syatandika kumwis’o naye naanasyasa. Naanatongana ati, “nguli neekwi̱li̱i̱ye nsoola sileka kumbona-boni̱ya.” du̱mbi̱ nsoola syatandika kwisila kimui. Obu nsoola syaboone mukaakulu oni tuhongo ntumwibha, syabu̱gha nga bantu nsighila siti, “dheka tweliile kibbodhe kini kitakaghendi̱ye ku̱gu̱ndi̱la mu etaka kwonkaha.” obu musaasa aaghu̱u̱ye ebi nsoola sikwete ku̱bu̱gha, aaku̱u̱mu̱u̱ka na nseko. Mbuwa yaamulola eye ataaghibona. Nseko esi syabbu̱mbu̱la makaikulu oni. Mukuwe ataalekeelela kuseka. Du̱mbi̱ mukaikulu eehu̱mi̱ya ati, “u̱u̱ hu̱u̱! Weesekele tita, siye tamba nimani̱ye ekyanjikaai̱ye munsi muni bbaa. Nguli neekwi̱la mpuumula ndu̱gha mu kubhaaja kuni.” makamala ku̱bu̱gha kiigambi̱ kya nsoola kyasa.
Syebbutika haa kibhodhe nsighila siti, “dheka tweliile kini kitakaghendi̱ye ku̱gu̱ndi̱la mu etaka busa. Musaasa aasuka ebi mbuwa yaamughambiiye bali mu kisaka. Mukaikulu aalekeela, obu muhala wee aaku̱u̱ki̱ye aasanga analekeeye. Obu katima kaatodhi̱ye kukuuk’o, mukaikulu aaghambila muhala wee ebyamulehukaan’o byona. Mukaikulu taatodhi̱ye amala kweli̱ ataku̱u̱ye.
haa lu̱ku̱ baabighambila bantu abaasi̱ye kubaghwila.

Ngoku Wakame aasweye mukali̱ wa basatu
Kyakimwa christine
Mu kyalo kya weehiilemu akaba alimu manaabukali̱ oghu beehitilagha kubbala kuswela.
Wakame, wanjoka na wantale bakaba bali bana bu̱u̱bhootu̱. Bu̱li̱ omui eeghomba kuswela manaabukali̱ oghu. Baahaana milimo. Wakame aaghenda kuleeta byokuliya; wanjoka aaghenda kuleeta byalaagha/bilaalilo; wantale aaghenda kuseena nkui. Boona baaki̱dhi̱la hamui baleeti̱ye ebi bendeeye.
obu bwahi̱ki̱ye lwagholo, wanjoka aaghila ati akubbala kuhuumul’o kati̱i̱. Wakame aaghila aghende alangaale ensi ya byalaagha. Wantale naye aaghu̱wa mpongo simukwete. Wakame aamughila ati aghende alangaale haa bwalaagha eegu̱u̱li̱. Wanjoka aaghu̱wa kintu kimutabiliiye kandi kimulyoteleeye. Aatandika kukiluma ati kyangu̱mu̱lu̱gh’o. Wantale aaghu̱wa kintu nkimusuna-suna, du̱mbi̱ aakwata lukui aatandika kuhuulanga byalaagha. Aabihuulanga, aabi̱tu̱wakaka. Wanjoka aaku̱wa. Wantale aatodha aalangaala. Buseguwe bwa wanjoka bwa mukoma haa mutima aakwi̱la mu mpongo. Wanjoka aaku̱wa na wantale aaku̱wa. Wakame aati̱ghala na banaabu̱kali̱ enkaha, baaswelana.

Kalimagheji naasi̱nga mugyano
Mubulya wilson
Wakamambo akaba ali bhootu̱ sya wansele hamui na wanjoghu̱. Wakamambo waawe aaghenda aaghambila wanjoghu ati akusobola ku̱mu̱singa mu bubhula mughuwo. Wanjoghu̱ aamughila ati wakamambo naamu̱bhu̱li̱ye akili aku̱ku̱lu̱ka mu kyalo eki. Na wakamambo aaghila wanjoghu̱ ati naye wanjoghu̱ naamu̱bhu̱li̱ye aku̱ku̱lu̱ka mu kyalo eki. Baat’o kilo eki bakubhulangana. Wakamambo du̱mbi̱ aaghenda aaghila wansele ati taali na maani̱ eye akusobola kumubhula kumuuya mu nanja. Wansele aamughila ati kaamambo naamu̱bhu̱li̱ye aku̱ku̱lu̱ka mu kyalo eki aghende hanji. Wansele aamughila ati taaliyo muntu munsi muni oghu ali na maani̱ ng’aghe. Baateela mpaka. Baateelan’o kilo kya kukola kamansi̱ngano aka. Wakamambo aat’o kilo kyonini eki baataayo na wanjoghu̱. Obu kilo eki kyahi̱ki̱ye wakamambo aaghenda aata mughuwo mu bikiya bya wansele mu maasi aatodha aaghenda aata luhande lunji mu bikiya bya wanjoghu̱ ebhimba. Wakamambo aaghila wanjoghu̱ ati bwile ni bwahi̱ki̱ye akuteela di̱fi̱li̱ niikuwo kubhulangana kutandike. Niikiyo kimui aakaghambiiye wansele. Wanjoghu̱ na wansele batamani̱ye apibho ya wakamambo. Obu bwile bwahi̱ki̱ye, wakamambo aateela di̱fi̱li̱. Wanjoghu̱ aagangi̱i̱si̱ya kubhulila kimui. Na wansele mu maasi aakpeeta ki̱si̱yo aagangi̱i̱si̱li̱ya kimui kubhula. Wanjoghu̱ aabhula na wansele aabhula. Wakamabo ali haagati naanaghila ati, “weekambe si̱ye tankamali̱yeyo maani̱ ghanje ghoona bbaa, baabhu̱li̱ye baabhu̱li̱y, baaluwakakani̱ya tolo. Du̱mbi̱ wakamambo aaghila ati, “tuleke.” wanjoghu̱ eeganga eli̱ na wansele eegenga eli̱. Wakamambo aaghenda e waa wansele aamughila ati, “naakusaaghi̱ye.” aatodha aaghenda ewaa wansele aamughila ati, “waasaaghu̱u̱we.”

Buteesighangana
Mugisa salapias
Hakaba aliyo wantale ali na mukali̱ wee baakaaye mu ki̱bhi̱li̱ bonkaha. Wantale aatandika kukwela numba mu elungu haagati.
mu ki̱bhi̱li̱ omu akaba alimu wanjoghu naye ali na mukali̱ wee. Bakaba baakaaye bonkaha batamani̱ye ngoku wantale naye ali mu ki̱bhi̱li̱ omu.
kilo kimui wantale aaghenda kutandika kukwela numba. Wantale eesal’o naakwela, akuuka ewe. Wanjoghu̱ atunga kyeli̱li̱kano kya kukwela numba. Naanaghenda kubbala kibanja kisemeeye kya kukwel’o aasang’o numba eghi eli makweluw’o, atandika kughikwela. Obu wantale aatodhiye kwisa kukwela numba yee aasanga bongeey¿o mulimo ghunji. Naye aatodh’o ghunji. Wanjoghu̱ obu aatodhi̱ye kwisa aasanga mulimo ghweyongeeye kusaali̱ya hambali aaghu̱ti̱ghi̱ye. Boona baakwela numba bataakusanga-sangaana. Numba yaahuwa bu̱li̱ omui aaghenda kuleeta mukali̱ wee kutaaha.
wantale aasa aataaha mu kisiika kimui. Wanjoghu̱ naye aasa, aasanga wantale ataahi̱ye mu kisiika kimui naye aataaha mu kisiika kinji. Numba eghi ekaba elimu bisiika bisatu. Ekyakasatu kyafooka bubiikilo.
wantale na wanjoghu̱ baaba bana mukagho. Baatandika kughenda kuhiigha hamui. Wantale aakaatagha bunyama wanjoghu̱ abuheeka. Niikuwo baakatu̱u̱ye batiyo.
kilo kinji baatodha baaghenda kuhiigha, wantale aakola ghwa kwita na wanjoghu̱ aakola ghwa kuheeka. Mbanaasa baasanga nsenge sili mu kiihamba nsinaaba. Wantale aalu̱tu̱kana aatali̱ye nsenge ntu̱u̱li̱ ekofi̱ limui yaakwi̱l’o. Wanjoghu̱ aadheedheluwa kimui, aaghila wantale ati kumanya nku̱si̱i̱mi̱ye nkukuheeka hamui na nyama waati̱ye sini syona.” wanjoghu̱ aakola kuwo.
obu baaki̱dhi̱ye e ka, wanjoghu̱ mukilo aaghila mukali̱ wee ati baku̱lu̱ke nanga wantale asaakaaye, akutali̱yagha kisolo ki̱kwi̱l’o, ataliisa abatali̱ya naasaaluuwe. Baabiboha mukilo baaku̱lu̱ka. Ki̱i̱se wantale nabo baaku̱lu̱ki̱ye mukilo nanga wantale kughambila mukali̱ wee ati, “wanjoghu̱ ali na maani̱ akuheekagha bisolo baati̱ye byona atodha aheeka naye wantale. Boona baaku̱lu̱ka, baati̱gha numba yabo batiyo.

Comments are closed.